Poëzie-wanjelinge

Vanaaf 2015 haet de Veldeke Krink Ech vief kieër ’n poëziewanjeling gehaoje in achtereinvolgendj Lilbosch (2015), Zöstere (2016), Staeveswaert (2017), Ech (2018) en De Nuujstadt (2019). Det gebäördje ederskieër in samewèrking mit de Sjrieverskrink Midde-Limburg en diverse muzikante taege ’t ènj van de zomer.
’t Idee van de poëziewanjeling is det de deilnummers ’n wanjeling make van zoaget ’n oer langs spraekendje puntje in die ómgaeving en oet ’t loestere nao speciaal väör dees gelaegenheid gesjreve gedichte of verhaole in ’t dialek. Die väördrachte waere – es ’t effe kan – ómliesj mit get passendje meziek.
’t Succes van de poëziewanjeling is vanaaf de ieëste kieër gewaes, det d’r mieë minse wildje mitloupe den good woor óm de opzèt tót zien rech te laote kómme. W’r ginge oet van 2 groepe van 30 deilnummers. In Zöstere, Staeveswaert en De Nuujstadt is de wanjeling opgezatj in samewèrking mit de lokaal heemkundevereniging. Zie kóste ’t bès de gesjikdje puntje aangaeve en de route bepaole. Mer de wanjelinge móste gein róndjleijing waere. W’r kómme waal op sjoan plekke, mer dao-äöver weurtj geine angere oetlèk gegaeve es waat de sjrievers in hun teks höbbe gesjreve. Nao aafloup woor edere kieër ’n gezellige aafsloeting.

Reageren is niet mogelijk