Es de S(j)terre S(j)traole

Ónger d’n titel: ‘Es de sterre straole’ organisere Veldeke Krink Ech en de Vereniging van Natuurvrienden oet Zöstere óm de twieë jaor ‘ne Limburgs-talige aovendj mit meziek, zank, väördrach van artieste oet Ech-Zöstere. Daobie kómme zoaväöl es mäögelik alle kerne oet de gemèndje aan bod.

De samewirking ligktj väör de handj. Zoawaal Veldeke es de Natuurvrunj hechte aan ’t behawd en ‘t gebroek van oos eige taal es óngerdeil van oos identiteit. Daoróm höbbe dees vereniginge zich same gepaktj óm get goods te kènne prissentere: ‘ne Ech-Zösterse aovendj.

’t Initiatief dateertj van 2010; de ieëste aovendj woor in 2011. En vervolges in 2013, 2015 en 2017. Ederskieër in de Hermeniezaal in Zöstere. Väör de leje van beide vereniginge, mer ouch väör al die anger belangstèllendje, leefhöbbers van de Limburgse taal. Mit ’n start-subsidie van ’t VSB-Fonds is ’t nog mäögelik zónne aovendj – woväör de optraejende artieste geine gage óntvange – väör ‘ne sjappelike pries aan te beje. De volgendje aovendj “S(j)terre S(j)traole” is in 2019.

Reageren is niet mogelijk