Krink Ech haet in de aafgeloupe periode weer twieë leje gehuldigdj door hun de waarderingspries “de Aanpakker” toe te kènne. Det wore Jan Housmans en Ton Jetten. Jan kreeg de pries door väörzitter Jos Wackers aangebaoje op de prinsereceptie van CV de Aester, wo teves zien jubileum es lid en nar waerdje gevierdj. Jan is bie VKE ’n actief lid en altied besjikbaar óm ’n hendje mit te helpe, gevraogdj en óngevraogdj.
Ton óntving zien waardering bie de jaorvergadering. Names ’t bestuur sprook de väörzitter dank oet väör ’t väöle werk bie de väörbereiding van o.a. ’t Echter Dictee en de Flitscursus en sinds kort ouch es väörlaezer in de Bieb.
Veldeke Krink Ech haet ’n paar jaor geleje de “Aanpakker” ingeveurdj óm leje die get bezunjers väör de krink doon, ’n extra waardering te gaeve. Die waardering weurtj oetgedröktj in de vórm van ’n aovehejs; den wits se wie se get mós aanpakke! Väör ’n äöverzich van deze pries klik verder.
Veldeke pries “de Aanpakker”.
Deze pries van Veldeke Krink Ech kan waere toegekèndj aan leje en neet-leje, die get oetzunjerliks väör de vereniging/Krink, väör ’t dialek of väör de volkscultuur in de regio höbbe gedaon, inhoudelik of financieel. ’t Is ’n waardering, mer teves en väöral stimuleringspries, väör betrokkene mer eventueel ouch väör angere.
In ’t verleje is deze pries toegekèndj aan:
- M. Maessen, van v/h Drökkerie Valkenburg in Ech, bgv. De oetgave van ‘t Waordebook R. Geurts, 1990.
- Ph. Teuwen, jaorelank de gastvrouw bie de Veldeke-bieeinkómste in v/h Hotel du Commerce in Ech, 1991.
Nao ’n lang periode haetj ’t bestuur in 2020 de Veldeke pries weer nuuj laeve gegaeve
W’r höbbe beslaote de Veldeke Pries de naam te gaeve van “Aanpakker” en de vórm van ’n aovewantj mit de vermeljing d’rop : Aanpakker, Veldeke Krink Ech.
De 1e aanpakker is in augustus2021 toegekèndj aan Marjo Jaski väör zien idee “Verhaole in coronatied” en de mitwèrking aan de oetwèrking daovan.
De 2e aanpakker is in mieërt 2022 toegekèndj aan Ton Slijpen väör zien idee Digitaal Echter Dictee en de realisatie daovan same mit de Wirkgroep Dictee in de corona-periode.
De 3e aanpakker wäördje in oktoaber 2022 toegekèndj aan Geert Janssen väör zien jaorelange mitwèrking es fotograaf waat o.a. resulteerdje in ‘n jaorliks foto-jaoräöverzich en ’t plaatse van foto’s in Veldeke Bekèt. Verder de opmaak van affiches, folders en oorkondes.
Jan Housmans kreeg in februari 2024 eine Aanpakker bie zien jubilea bie C.V. De Aester. Bie VKE stuitj hae altied klaor óm bie ’n activiteit van VKE de henj oet de moewe te staeke en haetj det ouch al hieël vaak gedaon!
Op 6 mieërt 2024 tiedes de jaorvergadering haetj Ton Jetten de Aanpakker gekrege ómdet d’r altied bereid is mit te wirke, wo zien hulp ouch mer väör gevraogdj weurtj. W’r numme de jaorkalender, ’t Echter Dictee, ’t väörlaeze, bezörging Veldeke Bekèt.
Naeve de Veldeke pries “de Aanpakker” kèntj VKE ouch ieëreleje. Ieëreleje waere aangeweze door de Algemein Leje Vergadering op väörstèl van ’t bestuur.
Väör ’n äöverzich hievan kiek op de website.