12 juni 2024: Wanjele op de Meinweg
Op woonsdig 12 juni ’n nuuj activiteit: ‘n poëziewanjeling in ’t natuurgebied “de Meinweg” bie Herkenbosch. ’t Betruf ’n aovendjwanjeling van 7 tót zoaget half nege en ’t is ‘n poëziewanjeling ómdet de gids óngerwaeg ’n paar gedichte zal väördrage. Leje die mit loupe, zeen oetgenuuedigdj det eventueel ouch te doon; ’n eige gedich of ’n bestaondj gedich passendj bie de sfeer van de vallendje aovendj en/of de natuur.
Deilnummers dene ’t verveur óngerling zelf te regele. W’r treffe ós taege 19.00 oer op de parkeerplaats bie de Venhof en de gids vertrèktj óm zeve oer. Via de A73 is det de aafslaag N 570. En bie Herkenbosch de aafslaag Venhof/Melikervenweg. Verzamele op de 1e perkeerplaats rechs vlak bie de Venhof. M’n kan natuurlik ouch via Vlodrop of O’berg/Melick kómme. Nao aafloup van de wanjeling gaon w’r same get drinke op ’t terras bie Venhof (of eventueel bönne es ’t te fris zoe waere).
*Aan dees wanjeling mit gids kènne maximaal 25 leje mitdoon. Om dit good te kènne regele is opgave väöraaf nuuedig. Det kan wie gebroekelik door 4 euro p.p. äöver te make op ’t raekeningnummer van de penningmeister (kiek achter op ‘t VB) en daobie naam en lidnummer op te gaeve (stuitj ouch achterop, baove de naam). Daomit höbtj g’r die ieëste consumptie den geliek betaaldj. Blif g’r langer, den is ’t vervolg väör eige raekening. Op tied aanmelje is ’t bèste; max. 25 deilnummers kènne mit bie de wanjeling en zoadra det aantal bereiktj is, zal de penningmeister ’n berich sture en eventueel betaaldj geldj trök storte. Vanwaege dit beperktj aantal kènne gein introducees mit.
5 juli 2024: Oetstepke mit de bös
De bösreis zal dit jaor zeen op vriedig 5 juli. Op ’t programma väör dae daag stuitj ’n oetstepke nao Aoke (Aken) mit ‘ne tössestop in Vaols. Dao bezeuke w’r ’n demonstratie van glaasblaoze. Daonao geitj de bös verder nao Aoke, wo w’r zoaget 12.45 oer aankómme väör de lunch (in de pries inbegrepe). Aansloetendj kómme gidse ós ophaole en höbbe w’r in groepe van 20-25 man ’n róndjleijing. Nao die róndjleijing ’n tractatie van kóffie mit gebak of ies (ouch inbegrepe).
Óm 17.15 oer vertruktj de bös weer nao hoes, wo w’r zoaget 18.00 oer haope aan te kómme.
Verder informatie in oos volgendje kwartaalblaad Veldeke Bekèt, mer ómdet det pas 15 juni versjientj en den nog mer korte tied väör ’t aanmelje zal zeen, vraoge w’r noe vas de datum te plenne en nao te dènke of g’r wiltj mit gaon.
Opgave väör dit oetstepke kèntj vanaaf noe door 45 euro p.p. äöver te make op de raekening van VKE bie oze penningmeister, weer mit vermeljing van eur lidnummer. Raekeningnummer en lidnummer staon oppe achterkant van eur Veldeke Bekèt. In deze pries is waal alles inbegrepe: bösreis, entrees, lunch, kóffie of ies. Aanmelje kan tót 1 juli of tót de bös vol is. Introducees kènne mit es nog plaats is; zie betale 50 euro.
Lètj op: trök betale bie neet mit kènne gaon is neet vanzelfspraekendj! De koste zeen den al gemaaktj en de bös blif aeve duur, ouch mit eine persoan mieë of minder. Baeter is óm bie ónverwachdje verhinjering óm mit te gaon, emes anges in eur plaats te vraoge.
De bös vertrèktj óm 09.45 oer vanaaf de Nuuj Mert. Tösse 18.00-18.15 oer zeen w’r weer trök in Ech.
