Dictee

Nao ’n väörig jaor mit succes gehaoje twieëdje versie van oos Echter Dictee in ’t Cultuurhoes, gaon w’r op zóndigmiddig 17 mieërt 2024 väör ‘t 3e Echter Dictee. Ouch noe weer in ’t Cultuurhoes Edith Stein aan de Plats in Ech. Deilname stuitj aope väör ederein. Aan deilname zeen gein köste verbónje.

Waat herinnere w’r ós nog van väörig jaor? De prissentatie van de dicteezinne door voetbaltrainer en awd Echtenieër Sef Vergoossen. Waem w’r dao dit jaor väör gevraogdj höbbe, haoje w’r nog effe geheim! En d’r wore betrèkkelik jóng wènnieërs op de 1e, 2e en 3e plaats: Mark Jessen, Magna Bedaf en Annette Creemers. Mark moog dit jaor ziene wisseltroffee kómme ómrule väör de begeerdje glazere Echter krakeling, die bie ’n ieëste plaats huuertj. En waem moog de troffee den vervolges dit jaor mit nao hoes numme?

Bie ‘t mitdoon kan m’n keze väör twieë menere: deilnumme mit jurering. ’t Dictee weurtj den nao ’t sjrieve opgehaoldj en door de jury naogekeke. ’t Besloet van de jurering en ’t aantal behaoldje puntje óntvungtj ederein persuuenlik trök. ’t Resultaat weurtj neet bekèndj gemaaktj, tenzij se det zelf duis. De deilnummers mit de minste foute waere waal geneumdj, want die kómme in aanmerking väör ‘n 1e, 2e, of 3e plaats bie de priestoekènning. De oetslaag van de jury stuitj neet ter discussie.

Mitdoon mit jurering is speciaal bedoeldj väör diegene die al dökker in ’t Limburgs sjrieve, get regels kènne en zich sportief wille maete mit anger deilnummers. Neet mieë, neet minder!

M’n kan ouch d’rväör keze óm zónger jurering mit te doon: “väör spek en boane”, zoa gezag. In det geval kan ederein ’t dictee make en zelf zien of häör dictee naokieke aan de handj van de ónger de pauze geprojecteerdje gooj sjriefwieze. Dees mäögelikheid is speciaal väör waem ’t èns zoe wille probere in good plat te sjrieve, mer väör waem d’n oetslaag neet belangriek is. Mesjien vèltj ’t mit en geis se ‘ne volgendje kieër ouch väör jurering mitdoon. En vèltj ’t taege, den höbs se d’r in eder geval get van gelieërdj.

Want dao geitj ’t óm: op ’n sportieve en eventueel competatieve meneer kieke wie ’t stuitj mit ’t sjrieve van oos eige taal. Alle deilnummers, die zich väöraaf höbbe aangemeldj, kriege nao aafloup ’n oorkonde. Aanmelje väör deilname geit mekkelik via de link hie ónger. Op dees meneer stuitj den edere deilnummer geregistreerdj mit de juste naam; dit in verbandj mit de oorkonde. ’t Dictee weurtj gedicteerdj door Piet Aben.

QR-CODE ED24 | LINK  nao ’t  ED24

Reglement Echter Dictee 2024

 

 

 

 

Ouch de Echter Dictees wo-aan in de tied van Corona van thoes oet kós waere mitgedaon , zeen nog besjikbaar. Die kènne nog altied gemaaktj waere, mer kènne neet mieë ingestuurdj waere en waere neet naogekeke. Ze kónne eventueel waal es oefenmateriaal dene. Daoväör hove gein persoonsgegaeves ingevöldj te waere.

10) Echter Digitaal Dictee December 2021

9) Echter Digitaal Dictee November 2021

8) Echter Digitaal Dictee Oktoaber 2021

7) Echter Digitaal Dictee September 2021

6) juli 2021: Echter dictee mit oetspraoke

5) juni 2021: Echter dictee mit spreuke

4) mei 2021: Echter Dictee mit spreuke

3) april 2021: digitaal waord dictee

2) mieërt 2021: Ech-Zöstere 75 jaor vrie

1) februari 2021: ’t Smaalste Stökske Nederlandj

 

Reageren is niet mogelijk