Ómdet dit jaor de declamatiewedstried väör de jeug van de basissjoale in de bekèndje vórm weer neet door kan gaon, haet Veldeke Krink Ech ’n alternatieve vórm bedach, wobie de kènjer oetgenuuedigdj zeen zelf aan de slaag te gaon: zelf ’n gedich zeuke of make en daovan ’n opname make. Bie ’t zeuke van ’n gesjiktj gedich wille w’r nog get hulp beje.
Net wie m’n in väörgaondje jaore op sjoal of in de bibliotheek oet ’n door Veldeke aangereiktj book ’n gedich kós oetzeuke, zètte w’r vanaaf noe ’n aantal gedichte hie oppe website. Twieë väör eder categorie wie bie de declamatiewedstried huuertj: korte väör de groepen 3 en 4; iets langer väör de groepe 5 en 6, en väör de kènjer van groep 7 en 8 weer get langer en ouch waat inhoud betruftj get moeiliker. Haopelik vuntj dao ederein waal get bie óm väör te drage. En zoe det neet zoa zeen bel den mit Piet Aben, dae kan vas helpe! (0475 482146)
Oefen ’t gekaoze gedich, draag ‘t väör en lik det vas. Det kan allein ’n geluidsopname zeen bv. ingespraoke via de telefoon en te versture es audio-app. Natuurlik is det noe mekkeliker es in ‘ne volle zaal en kèntj m’n ‘t gedich d’rbie pakke. Mer det väördeil haet ederein en al mit al is ‘t toch ’n spannendje opdrach.
De väördrach vas ligke kan ouch door middel van ’n filmke. Den kan m’n ouch aandach gaeve aan de attribute die de väördrach óngersteune. Ouch dit filmke kan den opgestuurdj waere. Nog spannendjer, mer väöl kènjer höbbe dao al ervaring mit.
Geluidsopnames en filmkes mótte gestuurdj waere aan: info@veldekekrinkech.nl. Det kan tót uterlik 31 mei 2021. In ’t berichske mótte verder de naam (väör en achternaam), sjoal en groep, adres en telefoonnummer vermeldj waere. Oet de ingestuurdje opnames en filmkes zal de jury ’n keuze make. Veldeke zal de wènnendje väördrachte oppe website plaatse. De resultate mótte namelik, net wie bie de declamatiewedstried, aan angere getuuendj kènne waere. Det beteikentj det mitdoon, automatisch geitj inhaoje det d’r toestömming weurtj gegaeve óm ze te plaatse. Es in de zomer de coronaregels dit weer zoewe toelaote, bekieke w’r ouch of life-optraejes ’n vervolg kènne zeen.
De werkgroep declamatie wètj haos zeker det väöl kènjer hie zin in höbbe en det se dao get feins van kènne make en is hieël benuudj nao de inzendinge!
Gebroek de óngerstaondje links óm ’n gedich te keze. Väöl succes!
Väör groep 3 en 4: Häörkes knippe.
Väör groep 3 en 4: Nuuj kleier.
Väör groep 5 en 6: Jojoë.
Väör groep 5 en 6: Sterre plökke.
Väör groep 7 en 8: Handjbal.
Väör groep 7 en 8: Op jach.
