’t Digitale Echter Dictee van de maondj mei, waat noe oppe website van Veldeke Krink Ech stuitj, bestuitj oet mer 6 zinne. Allemaol zègkswieze mit ‘ne glimlach. Mer ouch weer thoes op de computer te make in óngevieër ’n kerteer.
De wirkgroep van Veldeke wiltj mit de maondjelikse digitale dictees ’n alternatief beje väör ‘t dictee in ’t Kultuurhoes, waat noe – mit väöl minse d’rbie – neet mäögelik is. En ederein dae wiltj kan de oefening noe in eige tempo make, zónger al te groate spanning. Daoväör geit m’n nao de website van VKE: www.veldekekrinkech.nl. In de balk baovelangs de knóp “dictees” keze en m’n is rechstreeks op de gooj pagina. Hie staon alle tót noe gepubliceerdje dictees; ’t lèste en nuutste stuitj baovenaan, mer krig g’r de smaak te pakke, den kan de leefhöbber ’n eerder dictee eventueel ouch nog make.
Nao keze en aanklikke kömtj m’n in ‘t dictee-formulier mit ’t reglemènt. Hie mót ieës ingegaeve waere in welk van de 3 dialekte (van Ech, Zöstere of de Boesj) g’r ’t dictee wiltj sjrieve. En verder of se es deilnummer in de scorelies mit de anger deilnummers wils waere opgenómme mit naam en/of emailadres. Op ’t opgegaeve emailadres krig m’n ouch ’t persuuenlike contróleblaad gestuurdj.
Verder wèrktj ’t wie bie ’t live-dictee: de zinne waere regel väör regel väörgelaeze. De deilnummer typtj d’r ónger wie hae of zie dènktj det ’t gesjreve zoe mótte zeen. Door op ’n pielke te drökke kan m’n de väörgelaeze teks versjillendje kieëre opnuuj beloestere.
Wae det wiltj, kan zien dictee aan ’t ènj ouch insture en laote naokieke. Det gebäörtj den automatisch. Väör spelling gebroektj ‘t programmaj de spelling van Veldeke, zoa es die te vènje is in ’t Brónsgreun Beukske, editie Echt-Susteren en in de Zösterse Kal.
Ónger aan ’t dictee is de mäögelikheid óm opmerkinge te make. Aan de handj van die opmerkinge kan de wirkgroep aanpassinge in de dictees aanbrènge. Zoa zeen de recente dictees al korter en zeen de zinne ouch minder lank. In de automatische beoordeiling zeen bepaoldje aanpassinge gemaaktj. Mer neet alles kan bönne ’t programma! Belangriek is good te loestere en te sjrieve waat väörgelaeze weurtj. Ouch de puntje en laesteikes.
Weer wènse uch väöral plezeer mit ’t nuuj dictee en väöl succes. Klik op deze link óm nao ’t dictee te gaon!
