’t Bakkes in Limburg

Laezing äöver bakhoezer in oos provincie

“Es me broad wilt höbbe mót me neet op d’n aove sjlaope” zaetj ’n gezèkdje det dudelik lieëtj zeen waatfer inspanninge nuuedig zeen óm broad op taofel te kriege, zeker in vreuger jaore. Op versjeie plaatse op ’t plattelandj kömp m’n ze nog taege, die rustieke bakhuuskes wo oos väöraojers broad en vlaai höbbe gebakke. Ouch in de buurt van Ech-Zöstere zeen d’r nog ’n paar te vènje.

Els Diederen oet Valkeberg haet ’n paar jaor geleje ’n oetgebrèdje inventarisatie gemaaktj van die bakhuuskes, mit foto’s, besjrieving en al. Det is ’n indrökwèkkendj stökske cultuurhistorie. In ’t Jaorbook 2017 van Veldeke Limburg is daovan al ein en anger gepubliceerdj. In de laezing mit beeldje väör oze Veldeke Krink zal zie dao-äöver vertèlle. In ’t Valkebergs plat natuurlik, mer det is good te verstaon.

De laezing zal väör en nao de pauze ómliesj waere mit Limburgse meziek door Jos Meesen oet Gulpen. Jos zal daobie zichzelf begeleije op zien gitaar. Hae zal deze aovendj al bekèndje leedjes brènge, mer ouch nuje van zien recent oetgekómme CD.

De combinatie van ’n interessante laezing en meziek belaoftj weer ‘ne sjoane Veldeke-aovendj te waere: woonsdig 16 november óm 20.00 oer in de Pejjerhaof.

Reageren is niet mogelijk