Nao de succesvolle oetgave van ’n memoryspel mit Limburgse wäördjes in 2021, zal Veldeke Krink Ech – in naovolging van ’n paar anger kringe – dit jaor ’n kwartetspel oetbrènge in ’t Echter dialek. Dit spel ómvatj 56 kaertjes, mit 14 x 4 groepe wie o.a. kleiing, aete, dere, vastelaovendj, enz. Professioneel oetgeveurdj in kluuer en mit foto’s. Good väör väöl oere plezerig spele väör kènjer en volwassene. De väörbereiding van dit spel is noe in de lèste fase.
Allein väör leje bestuitj de gelaegenheid bie väörinsjrieving ’n spel te bestèlle. Det kosj den 8 euro per stök. Bestèlle kan tót 15 november a.s. door ’t bedraag van ‘t bestèldje aantal spelle äöver te make op ‘t raekeningnummer van VKE: NL65 RABO 0138 6319 64, mit vermeljing van naam en lidnummer. De bestèldje spelle kènne aafgehaoldj waere bie oos volgendje activiteit op woonsdig 16 november a.s.
Nao 16 november is ’t spel, zoalang es väörraod is, allein nog te koup bie de Veldeke-verkouppuntje, mer kosj den – ouch väör leje – 9,50-euro en det is nog neet te väöl!
W’r hove eigelik neet te zègke det dit ’n sjoan artikel is väör de kömmendje fieësdaag. Waem dao-äöver den wiltj besjikke, zal noe gaw mótte hanjele.
