Nao de Aester Aovendj!

Wie väörgaonde jaore zeen w’r es leje van Veldeke Krink Ech weer oetgenuuedigdj väör de speciale seniore-aovendj van de vastelaovesvereniging “De Aester”. W’r kènne det tót ein van de tradities bönne oos vereniging raekene. Dao zeen ’n aantal raeje väör.

Op de ieëste plaats waardere weer es Veldeke es anger vereniginge get róndj dialek organisere en prestere. Dao zeen w’r den gaer bie. Daonaeve wete de troew bezeukers van deze aovendj waat ze kènne verwachte: ‘ne geweldige aovendj mit ’n sjoan programma mit väöl artieste. Nuuj leje en wae d’r nog neet eerder is gewaes, zoewe dit èns kènne gaon mitmake. Zónne vastelaovesaovendj zoewe weer es krink neet kónne organisere en zeker neet väör die minimale biedrage van € 6,50 (introducees 7,50 euro). Dit jaor mit artieste wie buuteredners Hub Stassen en Ger Frencken. En verder Leonardo, Thei en Marij, Frans Croonenberg, Spik en Span en Die Power Buam.

Lètj op: Óm same van dae sjoane aovendj te kènne genete, mós m’n zich oppertied (uterlik op 3 januar) aangemeldj höbbe. De 69 leje die det al gedaon höbbe, zeen w’r gaer kómmendje woonsdig. De toegangskaarte krig g’r bie d’n ingank van Royal. Mer lètj op! D’r waere gein plaatse mieë gereserveerdj. Väör ’n gooj zitplaats zótj g’r dus op tied dao mótte zeen. De zaal is aope vanaaf 18.00 oer.

Haopelik zeen w’r ós op 10 januari 2018 ruum väör 19.00 oer in de hal van Royal oppe Pejjerstraot.

Geef een antwoord

Het e-mailadres wordt niet gepubliceerd.