Nao de al versjillendje jaore bestaondje cursus “Limburgs laeze en sjrieve”, wo-aan ouch bönne oze Krink al väöl minse höbbe mitgedaon, weurtj noe ’n methode óntwikkeldj väör ‘ne cursus, dae minse wiltj helpen die ’t Limburgs plat zoewe wille lieëre spraeke. De aafdeiling Limburgs, van de vereiniging van taaldocenten “Levende talen” is mit subsidie van de “Raod veur ’t Limburgs” hie al gerume tied mit bezig.
Waem zoe Limburgs wille lieëre spraeke? Det zeen soms minse die van boete de provincie hie zeen kómme wone. Vanwaege werk of angers. Es die al langer hie wone, verstaon ze ’t Limburgs waal good, mer spraeke durve de meiste neet. “Kal mer gerös plat” zègke ze den, “ich verstaon ’t waal”. Dit óm aan te gaeve det väör hun de groep neet hoof äöver te sjakele op ’t Algemein Nederlands. Mer ouch Limburgers, die van hoes oet neet ’t Limburgs höbbe lieëre spraeke, make de wèns óm plat te lieëre kalle regelmaotig kènbaar. Väör al die minse kan deze nuje cursus ’n oplossing zeen.
Net wie bie de cursus “Laeze en sjrieve”, wobie de Veldekespelling 2003 es oetgangspuntj deentj, mer wobie de cursusleider lokaal de toepassinge bie ’t eige dialect kan gaeve, zal ouch de cursus “Plat kalle” regionaal/lokaal ingevöldj kènne waere. Want emes dae in Ech wirktj en woontj, zal neet zoa gaw ’t Mestreechs wille lieëre spraeke. Daoróm höbbe docente oet versjillendje dialectgebiede aan deze cursus mitgewèrktj. Vanoet Midde-Limburg haef Marjo Jaski-Verheesen, same mit ’n aantal informante oet Ech en ómgaeving oos lokale dialect en oetspraok ingebrach.
Op dit momènt is m’n op zeuk nao minse die – es de methode gans klaor is – straks dae cursus zoewe wille gaeve. Wellich awd-docenten mit ‘ne taalachtergróndj of op z’n minst geveul väör taal. En ervaring in ’t les gaeve aan ‘ne groep. Vanzelfspraekendj mit leefdje väör ’t Limburgs. Zótj g’r zelf hie interesse in höbbe of mesjien emes anges kènne, dae det waal zoe kènne en wille doon, den kan väör mieë informatie contact opgenómme waere mit Limburgs@levendetalen.nl
Weer zólle uch hie op de huuegte haoje.
