Dhr. Gerrit Mestrum, geboren te Echt in 1921, was gehuwd met Willemijntje van Deutekom.
Es mitoprichter van Veldeke Krink Ech is hae bestuurslid/sikkertaris gebleve tót zien sterve op 19 april 1992. Gerrit waas ‘ne rasechte Pejjer mit väöl capaciteite. Zoa heel d’r van pen en penseel en maakdje hae väöl foto’s, dia’s en films van Ech en omgaeving. Hae waas nauw betrokke bie de realisering van de film “Pejjer luuj en landj” ’n monument äöver zien geleefdj dörp. Daonaeve gebroekdje hae de pen en kós hae in zien Pejjer dialect, mer ouch in ’t Nederlands, mit ènkel wäörd sfeervolle besjrievinge en gedichte make, dök ouch gepubliceerdj in landelike tiedsjrifte.
Vergankelijk
Alles geitj verbiej,
‘t gelök, ’t verdreet
en tenslotte ’t laeve zelf.
Gerrit Mestrum (Echt, juli 1987)
Woor die ster èns baove Pej blieve staon…….
Woors ste toch, kiendje, bie ós gebaore,
bie ós hie in Pej en neet in dae sjop.
Den hets Dich neet op det struue gelaege,
mer in ’n vaere bèd, mit ’n sprei d’r op.
Bie ós woors Dich noats in dae stal gekómme,
weer hejje de weeg naeve de baereklaw gezatj.
En menieër Pestoar woor zelf kómme baeje,
doe hats ’t mit dien aojers good gehadj.
Weer hejje dich get aangetrokke,
de sjoonste hömkes oet de lajekas.
En ’n floere jeske mit pels ane moewe,
en väör St. Joazef, eine werme wèntjerjas.
Kiendje wie weer Dich te aete gove,
smörges zelf gebakke wèk mit honing d’rop.
En gooj bótter en ’n lekker eike,
en smiddes: gebakke aerpel en hoonderesop.
En ouch riefkook, mit appelsjieve
gebakke, en daobie laeverwoos.
En ’t lekkerste beer det weer kóste kriege,
en riestepap en appelemoos.
Die Pejjer hejje Dich ’t bèste gegaeve,
en wore edere daag nao de kirk gegange.
Väör Dich hawwe ze oppe kneen gelaege,
en zich zelfs mit die van Ech verstange.
Noats haw nog örges ’n traon gevalle,
of waerdje emes anges leid gedaon.
Woors ste, kiendje, toch hie gebaore,
jao, hej die ster èns baove Pej blieve staon!!!
Gerrit Mestrum