Café Chantant mit leedjes van Toon Hermans

De leefhöbbers van Limburgse leedjes en leedjes van Toon Hermans kènne volop genete van deze muzikale aovendj mit ’n gedichske en ’n verhäölke. De optraejende artiest van d’n aovendj, Math Dircks oet Zitterd, is ‘ne klassiek gesjoalde zanger, dae op ’n bezunjer meneer, mit zien werm stöm, de richtige sjnaore wètj te rake. Det kump väöral door de arrangemente van de leedjes, die Ger Maesen haet gemaak. Ger begeleidj Math ouch bie zien leedjes.

Math Dircks is van alle mèrte thoes en wèt zich äöveral aan te passe, of det in de opera is, in de Baseliek in Zitterd, bie broelofte of begrafenisse. En zelfs bie de Oktoaberfeste! Weer zeen blie es Veldeke Krink zónne väölzijdige artiest in oos programma te höbbe. Daoróm beje w’r deze aovendj ouch weer – net wie väörig jaor bie “Cohen geit plat” aan es “café chantant”, wobie ouch neet leje van herte welkom zeen. In de zaal zeen zit- en staonplaatse besjikbaar.

Math stèltj zelf mit Ger zien programma same, geer kèntj uch daobie de volgende titels väörstèlle óm de sfeer te preuve: Piepestele – Café Biljart – Woo is de sjnee – Éngel Gabriël – De sjoanheid van ’n vrouw – Ich höb ’t laeve leef. “Ich hawt van Zitterd”, weurtj op daen aovendj väör ederein ’n bietje wörkelikheid.

Limburgse leedjes, gedichte en verhäölkes van Toon Hermans, mit zang van Math Dircks en meziek van Ger Maessen, op woonsdig 19 september 2018 Pejjerhaof 20.00 oer.