W’r kènne trök kieke op ’n good geslaagdje poëziewanjeling door ’t centrum van Ech op woonsdig 22 augustus jl. In 2 groepe van 30 persoane waerdje de wanjeling geloupe langs de bekèndje en – zoa bleek regelmaotig – ouch minder bekèndje locaties. Bie elk van die locaties stóng emes van de Sjrieverskrink Midde-Limburg en droog den zien/häör gedich of verhaol väör, det speciaal väör die plek woor gemaaktj. Op versjillendje locaties waerdje dit muzikaal ingelèdj en aangevöldj door meziek. Zoa wore djemba trómmels te huuere bie ’t klein Ursulinenkèrkhaof, ’n kwintet van harmonie St. Cecilia speeldje op ’t bènneplaetske bie de Zujerpaort, bie de stolperstein väör ’t Karmelklaoster speeldje Jean Pisters op bugel. Bie de Gasthoessteeg waerdje de wanjelieërs aafgehaoldj en toegezónge door ènkele leje van ’t Revue-koar en bie de Landricuskèrk huuerdje m’n sjoan slaagwerk van lieërlinge van de mezieksjoal SlagMolen.
’t Woor hieël gesjiktj waer en daodoor woor ’t nao aafloup nog good verblieve op ’t terras van Café Bongers / De Witte, wo de aafsloeting woor. Mit väöl waardering van de deilnummers en ’n hertelik waord van dank aan ederein dae mitgewèrktj haw door de väörzitter van Veldeke Krink Ech.
‘n gedich äöver de Stein-stein door Miranda Meuwissen
Lisa Naus lovendj äöver de Plats, vreuger en noe
‘n bedankje väör de jeugdige slaagwèrkers
nao aafloup gezellig naokalle
aandach väör ‘t kwintet van de Hermenie
Ich dach det m’n de wanjeling van väörige kieër in Staeveswaert, neet kós äövertreffe.
’t Woor aafgeloupe woonsdig grandioos!
De locatie, de sjoan verhaole en gedichte, de meziek en de aafwisseling van de versjillende meziekante, ’t waer en neet te
vergaete de gezellige naozit.
‘Petsjke aaf’, sjoan en puur reklaam väör de minse van Veldeke
krink Ech.
Organisatore van ’t programma en alle oetveurders, hieël hertelik bedank väör dees bezunjere wanjeling.
Volgende kieër bön ich d’n ieëste insjriever!