’t Concept is bie väöl leje al waal bekèndj van de eerdere edities in Roostere (2024) en Sint Joas (2022): ’n stökske wanjele, langs ‘n paar markante lokaties, mit get meziek en sjoan gedichte. En daonao nog ’n gezellig samezeen in ’t Gemeinsjapshoes, mit amusement van lokale artieste. Wae wiltj det noe neet?? Op woonsdig 26 augustus a.s. organiseertj Veldeke Krink Ech in samewirking mit minse oet de Ohé en Laker gemeinsjap “’ne Zomeraovendj op Genoea en Laak”, want dao precies zeen w’r dae aovendj. En de naam zaetj ’t verder al, w’r haope op ‘ne sjoane zomerse aovendj natuurlik.
De aovendj zal oet twieë gedeiltes bestaon. W’r vertrèkke taege 19.00 oer vanoet ’t plein, bie ’t Gemeinsjapshoes en kort bie de kèrk. D’r zal geloupe waere in 4 groepe van eder maximaal 20 persoane, zoadet de väördrachte ouch good te verstaon zeen. Op eder plek haetj de Sjrieverskrink Midde-Limburg weer gezörgdj det d’r ’n speciaal väör die lokatie gesjreve gedich of verhaol weurtj väörgedrage, ómliesj mit ’n sjoan stökske meziek van muzikante van de Laak of muzikante die ’n bènjing daomit höbbe. W’r bezeuke ’t monumènt van de Noatevraeters, ’t Domicilia-park, kestieël ’t Geudje en de kèrk; edere groep in ’n anger volgorde en loupe nao zoaget ’n kerteer weer verder nao de volgendje plek.
Nao de pauze zal ’t twieëdje gedeilte van de aovendj plaatsvènje in ’t Gemeinsjapshoes. Versjillendje Laker artieste, zörge det d’r ’n gevarieerdj programma op de planke kumptj. Van meziek tót gedich, van zang tót verhaol, alles kumptj aan bod.
De pries óm deil te numme is € 6,- p.p. en det is inclusief ein consumptie. In de zaal kènne eventueel penninge waere biegekochtj. Opgaeve en betale kan door dit bedraag äöver te make op de bankraeking van Veldeke Krink Ech: NL65 RABO 0138 6319 64, o.v.v. eure naam en lidmaatsjapsnummer. Mer lètj op: tót ’t maximale aantal van 80 luuj is bereiktj! Aan deze aovendj kan ederein deilnumme, ouch minse oet Ohé en Laak zelf, dus neet ènkel leje. Es ’t maximale aantal deilnummers is bereiktj, kriege de te-laatkómmers uiteraard hun geldj trök. De angere kriege verder gein berich.
W’r kómme op woonsdig 26 augustus óm 18.45 oer bie-ein op pleintje naeve de kèrk. Fietse kènne dao gestaldj waere. Alle 4 de groepe vertrèkke tegeliek vanaaf dao óm 19.00 oer.
Auto’s estebleef parkere vlakbie oppe Mert.
