De cursus laeze en sjrieve van Veldeke weurtj bönnekort weer gegaeve in Ech. Deze is bedoeldj väör minse die ’t Limburgs al spraeke, mer gaer hun vaardigheid oetbreije óm ’t plat ouch te kènne sjrieve volges de door Veldeke oetgegaeve regels en aafspraoke, zoadet dit ouch väör angere te laeze en te begriepe is. In de cursus weurtj dao oetlèk äöver gegaeve en geoefendj. Waem de cursus gevolgdj haet zal zich good wete te behelpe mit ’t Limburgs laeze en sjrieve, speciaal ’t Echs.
De cursus omvatj 3 lesse op de maondigaovendje 12, 19 en 26 oktoaber edere aovendj van 19.00 tót 21.30 oer. Dao aan kan waere deilgenómme door leje van Veldeke mer ouch door waem neet lid is. De koste väör leje zeen 30 euro väör de ganse cursus en eventueel lesmateriaal; neet-leje betale 45 euro. Det is mit inbegrip van ’n tas kóffie of thieë tiedes de lesse. Veldeke is in äöverlèk of de cursus kan gegaeve waere in de bibliotheek.
Väör VKE zal bestuurslid Marlène Scheres-Verheesen dit gaon doon. Marlène haet ouch al ’n paar jaor ervaring mit de cursus “Leef Limburgs”, bedoeldj väör minse die ’t Limburgs zelf nog hieëlemaol neet spraeke, mer det waal wille gaon doon. Dae cursus blif ouch bestaon, naeve de cursus “Laeze en sjrieve”, dae door ederein gevolgdj kan waere dae ’t Limburgs waal spruktj, mer vaardigheid wiltj kriege in ’t laeze en sjrieve.
Opgaeve väör de cursus kan mit ‘ne email aan info@veldekekrinkech.nl, ónger opgave van naam en (email-)adres. Betale kan bie de ieëste les of op ’t raekeningnummer van VKE, NL RABO 0138 6319 64. Väör vraoge äöver de inhawd van de cursus: 06 1288 9748.
