Op woonsdig 14 oktoaber a.s. haet VKE väör de leje weer èns nao ’n film kènne aafspraeke in de Royal Servicebioscoop in Ech. ’t Is al weer aeve geleje det w’r dit höbbe kènne doon; ’t aanbod van Limburgstalige films of films die inhoudelik äöver Limburg gaon, is neet ruum. De film die w’r noe höbbe gevónje haet es titel “Kwestie van geduld”. Is ’n film van al get jaore geleje, neet in ’t Limburgs gespraoke, mer waal mit get lienkes nao oos provincie.
Ze geitj äöver de chef-kok Monica, gebaore en opgegreujdj in Gulpen, mer dao op zeker moment vertrokke óm in Amsterdam ’n nuuj toekóms te beginne. Es ‘t dao same mit ziene vrundj ’n restaurant wiltj beginne, mót ze óm get zake te regele trök nao häör gebaortestreek. En den volge de óntwikkelinge; väöl bliektj d’r verangerdj, mer hieël väöl mieë veultj vertroewdj. Waat te doon?
Deze filmaovendj zeentj g’r väöraaf weer vanaaf 19.00 oer welkom in de foyer, wo ederein den van kóffie en ’n stök vlaai kan genete. De koste daovan zeen bie de pries van 10 euro väör deze aovendj inbegrepe. Ouch väör ‘ne introducee, es g’r eventueel emes zoetj wille oetnuuedige óm mit te gaon. De filmzaal geitj óm 19.45 oer aope en de film begintj óm 20.00 oer. Nao aafloup kan m’n nao wèns nog gezellig get naokletse in de foyer.
Bezeuke kan allein mer door väöraaf – tót uterlik 10 oktoaber – 10 euro p.p. äöver te make op ’t raekeningnummer van Veldeke Krink Ech (kiek hieväör op de achterkantj van ’n Veldeke Bekèt bie de penningmeister) mit vermeljing van eur lidnummer. Betaaldj beteikentj gereserveerdj. Zónger taegeberich verwachte weer uch den op 14 oktoaber vanaaf 19.00 oer.
