Wanjele langs de Middelsgraaf

Op zaoterdig 29 september is de jaorlikse wanjeling, georganiseerdj door de Natuur Historische Vereniging “Pepijnsland” väör eige leje en väör de leje van Veldeke en de Heemkundekring in ’t kader van oetwisseling en samewèrking. De wanjeling is dees kieër langs de bekèndje baek de Middelsgraaf. Die is de lèste jaore gans opnuuj ingerichtj: natuurvriendelik slingerendj door ’t landjsjap en neet mieë rechtoe-rechaan, wie ze nao ’n eerder kanalisatie woor gewore. Nou ja, inzichte verangere soms.

De Middelsgraaf passeertj “’t Smaalste stökske Nederlandj” vanaaf de grens bie Schalbruch en stroumtj via Zöstere-Hei en de Daort in de richting van de A2 bie Ophaove. Dao kömtj ze oet in de Gelaenbaek.
Bie de excursie, die ónger begeleiding is van de bioloog Harry van Buggenum, waere ouch de flora en fauna van dit baekdal bekeke. Direct nao de herinrichting höbbe zich op de toen kale gróndj de ieëste kruuje en houtige gewasse gevestigdj en de natuur haet zich gans herstèldj, zoawaal in es langs ’t water. Mit de oetlèk van de gids zal ‘t ’n interessante natuurwanjeling waere. Dènk aan gesjikdje sjoon, want zeker bie naat waer kan de kleigróndj glaad zeen.

De wanjeling begintj óm 9.30 oer vanaaf de Observatiepost Doort en zal zoaget de ganse mörge doere, op zaoterdig 29 september a.s.

Geef een antwoord

Het e-mailadres wordt niet gepubliceerd.