Vriewilligers aovendj

’n Vereniging wie Veldeke kan neet zónger de mitwèrking van väöl minse. Minse die weliswaar neet in ’t bestuur zitte, mer die toch hun specifieke kwaliteite wille inzètte óm de krink te laote drejje wie d’r noe drejtj. VKE is den ouch gruuets op zien vriewilligers.

Door vriewilligers bie ’t väörbereije en oetveure van de activiteite te betrèkke, kómme dök ouch anger ideeë en oplossinge oppe taofel. Versjillendje ideeë en benaderinge verrume ’t palet van mäögelikheje en det is good.

Eine kieër p’r jaor, op de lejevergadering dit oetspraeke vuntj ’t bestuur neet genóg. Dao moog bès ’ne kieër get speciaals taegenäöver staon.

Det is ’t idee gewaes van de vriewilligersaovendj. Noe veer jaor geleje ingebrach mit de bedoeling det óm de twieë jaor te doon. ’t Vervolg waerdje dus door corona ónmäögelik gemaaktj, mer wille w’r noe weer oppakke. Op woonsdig 19 oktoaber, väör alle minse die de aafgelaope 3 jaor klaorgestange en mitgeholpe höbbe bie diverse aktiviteite. Det kan zeen mit ’t organisere van bv. de declamatiewedstried väör de kènjer van de basissjoale, mit ‘r bezörge mer ouch ’t financieel mäögelik make van oos kwartaalblaad Veldeke Bekèt, bie de realisering van de berichgaeving via de media facebook en website, bie ’t controlere van de bookhaojing zoa wie de statute det väörsjrieve, bie ’t väörlaeze en väördrage bie versjillendje gelaegenheje, ’t óntwikkele van de (digitale) dictees, bie ’t klaor zètte en oprume van de zaal en gank zoa mer door.

De aovendj zal muzikaal opgeloesterdj waere door ’t duo Ruud en Ruud. Ouch zal eine kleine kwis gehaoje waere óm oet te perbere of det in de toekóms ’n nuuj activiteit zoe kènne waere. W’r zörge väör ’n hepke en ’n drenkske en allemaol same väör ‘ne óntspanne aovendj. Väöraaf effe aanmelje is in verbandj mit de organisatie waal nuuedig. Det kan via: info@veldekekrinkech.nl.

W’r treffe ós vanaaf 8 oer in de Brasserie van de Pejjerhaof en ederein dae zich vriewilliger bie VKE veultj, is hertelik welkom op woonsdig 19 oktoaber.

Reageren is niet mogelijk