De internationale daag van oos Modertaal vèltj in 2020 op de vriedig väör vastelaovendj, op 21 februari.
Daoróm haet Veldeke ’n invölling gezócht die dao bie good pasj. Op de radiozender L1 zeen de ganse daag, tösse de vastelaovesmeziek door, väördrachte te huuere in de versjillendje Limburgse dialekte. Det is bezunjer väör ‘ne zender dae tót noe toe neet zoaväöl in ’t Limburgs wól doon. O.a. door minse van de Sjrieverskrink Midde-Limburg, ouch sjrievers oet Ech en Zöstere, zeen tekste ingestuurdj, mer welke oeteindelik oppe radio kómme is noe nog neet bekèndj. Laotj uch dus mer verrasse!
In ’t kader van ’n estafette van activiteite van de versjillendje Veldeke Kringe hultj Veldeke Krink Ech saoves, vanaaf 19.00 oer in ’t Groat Kefee van ’t Kultuurhoes aan de Plats dae aovendj ’n spraekoer.
Ónger de naam: “Good Plat”. Dao is ederein hertelik welkóm, óm plat te kalle natuurlik. Mesjien prinse of raoje van èlf taege te kómme, nao meziek te loestere, enz. Mer zeker en bezunjer welkóm zeen minse die nog mit tekste worstele väör hunne vastelaoveswage of hun einzelgänger-act. Gaer wille w’r die helpe es d’r probleme zeen mit “wie sjrifs se det?” Want vastelaovesgrappe kómme pas good äöver es ze door de minse langs de kantj ouch begrepe kènne waere. En det begintj mit good kènne laeze, good sjrieve dus! Veldeke Krink Ech wiltj daobie helpe. Ouch es g’r eur óngerwerp nog geheim wiltj haoje. W’r trèkke ós den effe trök in ’n “geheim kaemerke” in ’t Kultuurhoes, wo den alle vraoge gestèldj kènne waere en alle hulp gebaoje. Maaktj d’r gebroek van!
