Algemein Jaorvergadering

De jaorvergadering van Veldeke Krink Ech is dit jaor op woonsdig 4 mieërt in de Pejjerhaof en begintj óm 20.00 oer. De vergadering weurtj door Veldeke aangeklèdj es ’n activiteit: d’r is kóffie mit vlaai, verder ouch meziek door de Mestreechtse zènger Roger Villevoie en foto- en filmpresentaties van activiteite van ’t aafgeloupe jaor.

Mer ieës kieke w’r in dees algemein vergadering trök op ’t verenigingsjaor 2019. Statutair doon w’r det mit ’t väörlaeze, bespraeke en vasstèlle van ’t jaorverslaag.
De kascommissie brungtj verslaag oet van hun bevènjinge, bie ’t doornumme van de financieel stökke. Det verslaag mót ouch vasgestèldj waere. Daonao kömtj de beneuming van ‘n nuuj lid väör dees commissie aan de orde. ’t Väörstèl van ’t bestuur is de contributie in 2020 neet te verhuuege.

Nao dees geldjzake de bestuurszake: volges ’t ruuester van aaftraeje zeen Anke Heythuysen-Corstjens en Ton van Wegberg aan de bäört óm aaf te traeje. De väörzitter zoe nao 8 jaor gaer ‘ne opvolger zeen en zich neet mieë herkeesbaar stèlle; Anke is herkeesbaar. Leje van Veldeke kènne bestuurskandidate bekèndj make bie de sikkertaris t/m 1 mieërt 2020, emes väördrage of zichzelf opgaeve es kandidaat bestuurslid. Nao de bestuursverkezing is d’r tied väör de pauze mit de foto presentatie van Geert Janssen van de activiteite die in 2019 gewaes zeen. Daobie sloete nao de pauze ouch ’n 2-tal filmkes aan, die bie de presentatie äöver de Echter Krakelinge en Vuurstein in november jl. neet good op gang kome. Det zal noe toch lökke?!

Mit ’n vraogerundje sloete w’r de aovendj aaf.

Geef een antwoord

Het e-mailadres wordt niet gepubliceerd.