2e Echter dictee.

De väörbereidinge zeen in gang gezatj väör de twieëdje editie van ’t Echter Dictee. W’r kónne waal zègke: “Wegens succes geprolongeerd!” ‘t Väörig jaor – de ieëste kieër – wore d’r ruum 20 deilnummers en väöl publiek. Minse die de kat èns oet de boum kome kieke, want wie geitj det? M’n vreug zich aaf: Loup ich ’t risico óm aaf te gaon es ich d’r neet zoa väöl van weet? Mer niks van det!
’t Woor ‘ne hieël óntspanne en gezellige sfeer en ‘n wènneres van de trofee, Annette van Kempen, vanne Laak. Raeje genóg väör de werkgroep van Veldeke Krink Ech óm ’t nog èns äöver te doon. De opzèt is in groate lien ‘tzelfdje, mer natuurlik zeen d’r ouch ’n paar dènger aangepasj. ‘t Dictee krig, net es ‘t väörig jaor, ‘n thema. Mer ’t is waal get korter. Ouch de wachttied bie ’t naokieke zal den korter zeen.

“t Twieëdje Echter Dictee zal plaats vènje op zóndigmiddig 15 mieërt a.s. vanaaf 14.00 oer in de groate zaal van ’t Cultuurhoes aan de Plats in Ech.

Mitdoon aan dit dictee stuitj aope väör ederein: inwoners van Ech-Zöstere, mer ouch anger belangstèllendje oet de regio en dao boete. Te dènke aan awd-inwoners of minse oet de regio. Waal zal ’t Echter dialect es oetgangspuntj gelje: zinne waere in ’t Echs väörgelaeze en de jury hanteertj oos Brónsgreun Beukske, (editie Ech-Zöstere) es maotstaaf.
De titel “Echter Dictee” wiltj in eder geval neet aangaeve det allein Echtenieëre zoewe kènne insjrieve. Of waem allein Echs spruk. Ederein, kleine of groate leefhöbber van de Limburgse taal en van de spelling d’rvan kan mitdoon.

Aanmelje väör ’t Echter Dictee kan vanaaf noe. Det kan hieël mekkelik mit behulp van de hiebie geplaatsjde QR-code. Zoew det óm ein of anger raeje neet lökke, gebroek den ’t emailadres: aa.jetten@gmail.com.

Aanmelje kan ouch mit behulp van deze link:
2e Echter Dictee!

Geef een antwoord

Het e-mailadres wordt niet gepubliceerd.