Meziek en väördrachte róndj sages en legendes!
Op zaoterdig 26 november en zóndig 27 november 2016 organiseertj de Veldeke Krink Ech ‘ne fieëstelike aovendj in de groate zaal van de Pejjerhaof in Pej-Ech. ’t Weurtj ’n muzikaal spektakel wo-aan versjillende vereniginge en artieste mitwèrke.
Eigelik zaetj de titel alles: “Van huuere en zègke”: aoj, spannendje verhaole oet eige ómgaeving waere in meziek en väördrach op de planke gebrach en in ’t leech gezatj. Verhaole die lang geleje zeen óntstange en die hieël lang allein mer zeen doorvertèldj, van de ein op de anger generatie. En wie det den geitj….. Ze waerdje in de loup van de jaore stieëds ein bietje aangepastj, sjoner gemaaktj, akeliger, spannendjer, of geheimzinniger. Wie ze d’r oorsponkelik oetzoge, weite w’r neet mieë. Zo’n volksverhaol numme w’r ein sage.
De sfeer van die verhaole weurtj opgerope in de meziek van de fanfaar St. Joseph oet Pej, ’t Mannekoar van de Boesj, ‘ne combo, ’n kènjerkuuerke en versjillendje soliste: Judith Hover-Theunissen, Britt Eberson en Piet Geuskens. De kènjer zènge leedjes van de groep Carboon op gehieël eige meneer. De prissentatie van ’t gehieël is in henj van Henk Hover.
Waat w’r uch in eder geval noe al wille verklappe is det de Juffrouw zónger Kop en de Bokkeriejers väörbie zólle kómme op deze aovendj. De kepel van Sjaelberg en de reuze oet de Deelgaard. Wie al gezag: in sfeer, mit leech en geluid woväör w’r de techniek van de Echter Revue höbbe ingesjakeldj.
Det ‘t ‘ne sjoane aovendj zal waere is zeker! Noe mótj geer allein nog kómme: alle leje en mit leefs väöl introducees. Laotj ouch eur femielie en vrunj ervare wie sjoan ‘ne aovendj in de Limburgse taal kan zeen. Väöl luuj in de zaal maaktj ’t neet allein gezelliger, baeter en väör de artieste plezeriger óm op te traeje. ’t Hulptj ós ouch oet de koste te kómme, want die zeen hoag bie zo’n productie. Toch kènne w’r, o.a. door ’n bezunjer biedrage van ‘t 90-jaorige Veldeke Limburg, deze aovendj aanbeje väör 10 euro. Waal bie kaartverkoup väöraaf. Aan de aovendjkassa geit ‘t 12,50 koste.
Kaarte kènne gekoch waere bie Martien Aerts, St. Jorisstraot of bie van Ool-Colors, Aasterbergerweg 19. De aovendj “Van Huuere en Zègke” begintj op 26 november óm 20.00 oer en op zóndig 27 november óm 14.00 oer. De zaal Pejjerhaof – Houtstraot 7 in Pej-Ech is ’n oer eerder al aope. De väörstèlling doertj – mit pauze – zoaget twieë en ’n half oer.
