René Geurts geïeërdj mit herdènkingstegel oppe Plats

Bönnekort, om precies te zeen: op woonsdig 18 april a.s. zólle de ieëste spreuke-tegels geplaatsj zeen in de nuuj bestraoting van ’t Echter winkelcentrum en waal oppe Plats. Det zal officieel gebäöre tiedens ’n samekóms in de Gooj Kamer van ’t Museum, die begintj óm 11.00 oer. Óm óngevieër half twelf zal börgemeister J. Hessels boete, väör ’t museum, ‘ne speciale tegel ónthulle dae is opgedrage aan René Geurts.

Wie w’r al eerder gemèldj höbbe haet ’t bestuur van Veldeke Krink Ech ruum ’n jaor geleje ’t gemèndjebestuur benaderdj mit ’t idee óm in de väörbereiding van de planne väör de herinrichting van ’t winkelcentrum op te numme det dao-in ’n aantal hardsteine tegels gelag zoewe waere mit dao-in gegraveerdj ’n aantal spreuke en gezègkdjes in oos dialect. Det vónj m’n ’n good plan. B & W stèldje aan de raod väör óm daoväör extra geldj besjikbaar te stèlle en ouch det gebäördje. Bliekbaar vónj ederein ‘t ’n good idee, inclusief de winkeleers die betrokke woorte bie ’t oetwèrke van de planne van de winkelstraot.

En noe is ’t zoa ver. Oet waal 400 spreuke, zinne, gezegkdjes – wovan ’n groat deil door inwoners is ingestuurdj – zeen d’r twintjig gekaoze. Óm die keus te kènne make haet de werkgroep ’n aantal criteria gevolgdj, mer d’r hawwe mesjien ouch waal twintjig angere gekaoze kènne waere. Zoa väöl wore d’r besjikbaar.

Beslaote is óm oppe Plats eine tegel te bepale es herdènkingstegel. Mit ‘ne regel oet ein van zien gedichte weurtj de Echtenieër René Geurts (1897-1977) herdach en geieërdj. Hae woor p’r slot van raekening gedurendje väöl jaore oppe Plats actief es ieëste conservator van ’t Streekmuseum det woor óngebrach in waat noenog waal geneumdj weurtj ’t awd gemèndjehoes: ’t Cultureel Centrum de Plats.

W.A.René Geurts woor directeur van de toen in Ech gevestigdje Bisschoppelijke Kweekschool. De historie van Ech en zien inwoners en de ómringendje natuur wore zien hobby’s en hae sjreef dao regelmaotig äöver. In 1977 woor hae mede-oprichter van de Veldeke Krink Ech. Verder woor hae de sjriever-samestèller van ’t ieëste Echter waordebook mit de titel “Seppig wiej ein smawtpaer”. Geurts gebroekdje dao-in zien eige spelling, want d’r woor – in 1988 – nog gein sprake van ’n Veldeke-spelling. De hieër Geurts woor ereburger van de Gemèndje Ech. Op d’n tegel kömtj de regel: “Oos taal die blinktj en sjittert: het koper van de fanfaar op percessiedaag”.

De äöverige tegels zólle in de loup van de zomer, bie de vordering van de werkzaamheje, in de bestraoting van de Baovenstestraot gelag waere.
Veldeke Krink Ech haet zich väörgenómme de anger spreuke hie of dao ouch te gebroeke; is ’t neet op ‘ne tegel, den op ’n anger plaats. Ónlangs is gestartj mit ’n rubriek “Wie Gezag… En Bedoeldj” in ’t waekblaad EchtNieuws: waekeliks weurtj dao ’n spraekwaord of gezègkdje geprissenteerdj en toegelichtj.

Geef een antwoord

Het e-mailadres wordt niet gepubliceerd.