Dit gebroek kèntj al ’n lank bestaon. Op 14 november 1834 goof Paus Gregorius XVI ieëwigdoerendj ‘ne volle aaflaot aan ederein dae, nao gebiechtj en gecommuniceerdj te höbbe, op ’t fieës van ‘Lès Levrouw’ (’t lèste Mariafieës: Maria geboorte, 8 september) en ’t dao-aan verbónje octaaf (8 daag) de kapel van Sjaelberg ging bezeuke. Väör de minse oet dae tied en nog väöl jaore d’rnao – väöral oet Ech en alle biebehuuerendje gehuchte – van hieël groate beteikenis! ’t Waerdje väöl jaore lank gevierdj es ‘ne zóndig; oet de ómligkendje parochies trokke processies nao de kapel van Sjaelberg en kome väöl minse nao dit fieës en óm dae aaflaot te verdene.
De tieje zeen verangerdj en de opvattinge äöver geluif en kèrk ouch. Mer ’t geveul bie de kapel van Sjaelberg en de legende van Maria en de herder is bie väöl minse gebleve. Die herinneringe waere ouch laevendj gehaoje door de jaorlikse vering van de octaaf. Op ’n meneer die bie deze tied pasj.
Aan de äöpeningsmès op de ieëste zaoterdig van ’t octaaf weurtj al ’n paar jaor door Veldeke Krink Ech mitgewèrktj. Ouch dit jaor weer: op zaoterdig 7 september, óm 19.00 oer in de paviljoentent bie de kapel. G’r zeentj dao den allemaol welkom.
