Poëziewanjeling door de Nuujstadt

De poëziewanjeling van dit jaor zal in de meis zuidelike kern van de gemèndje Ech-Zöstere zeen: de Nuujstadt. Dao höbbe w’r in äöverlèk en samewèrking mit de Heemkundevereniging en stadsgidse de plekke oetgezóch wo w’r langs wanjele en wo w’r effe stil staon ‘m te loestere nao ’n väórdracht en meziek. Det zal den dit jaor väör de viefdje kieër zeen, det Veldeke Krink Ech zo’n wanjeling organiseertj.

De wanjeling vuntj plaats op woonsdig 21 augustus taege de aovendj en w’r raekene daobie natuurlik weer op sjoan waer. Wie bie de poëziewanjelinge gebroekelik, is ’t ’n toch langs bekèndje of ónbekendje plekke, mer ’t is gein róndjleiding mit oetlèk! Speciaal aan dees wanjeling is det ’t verhaol van die plekke wo w’r aeve blieve stil staon, weurtj oetgedröktj in ’n gedich of verhaol. Daobie hie en dao ouch passendje meziek. Det alles geuf de poëziewanjeling ‘ne bezunjere sfeer.

W’r loupe in 2 groepe van 30, zoadet de väördrachte ouch good te verstaon zeen. Mer lètj op: det zólle neet allemaol leje van Veldeke zeen. De Heemkundevereniging zal dees wanjeling ouch aan hun leje aanbeje en ouch inwoners van de Nuujstadt kónne mit loupe. Mitwèrking väör de intermezzo’s in poëzie en/of meziek höbbe w’r weer gezóchtj en gekrege bie de sjrievers van de Sjrieverkrink Midde-Limburg en bie ’n aantal muzikante oet de ómgaeving. Waem mit geit loupe mót raekening haoje mit ruum ’n oer wanjele en staon. Mit rollator is de route neet te loupe. Stevige sjoon zeen aan te bevaele.

Nao aafloup kan m’n ’n tas kóffie of get anges drènke en eventueel op terras biekómme en/of naopraote. Dit drenkske is inbegrepe in de deilnamepries van 4 euro p.p. dae w’r väöraaf bie opgave wille óntvange. Mer lètj op: tót dit aantal is bereiktj! Aan de wanjeling kan ederein deilnumme, dus neet ènkel leje. Det is ouch de bedoeling, mer ‘t kan ouch beteikene det ’t aantal gaw is gehaoldj, wie väörig jaor. Den kriege de te-laat kómmers berich en hun geldj trök.

De deilnummers, die gein berich höbbe gekrege, waere óm 19.30 oer verwachtj bie ’t vertrèkpuntj. Det is de parkeerplaats oppe Mert in de Nuujstadt. Van hie aaf zólle w’r ouch vertrèkke. Det kan beteikene det ‘ne groep get langer mót wachte bie ‘t vertrèk (henjig es m’n get laat is). Mer de ieës vertrokke groep zal nao aafloup mótte wachte tót ederein bönne is. Bie slech waer geitj ’t neet door en sjuuftj de wanjeling 2 waeke op.

Aanmelje is op dit moment neet mieë mäogelik, ómdet ’t maximum aantal al is bereiktj. Waem zich aangemeldj haef, krig gein berich mer weurtj op woonsdig 21 augustus, 19.30 oer verwachtj op de Mert in de Nuujstadt.

Geef een antwoord

Het e-mailadres wordt niet gepubliceerd.