Dit verhaol is ‘t 25e in oos verhaole project. ’n Klein jubileum dus! Det geuftj tegeliek aan wie lang w’r allemaol al in dees oetzunjerlike situatie zeen. Want ’t woor half mei wie w’r ’n begin maakdje mit ’t plaatse van “Loesterverhaole” op oos website. De “Veldeke bliftj thoes”-periode woor net ingegange, waat beteikendje det gein activiteite kóste plaatsvènje. Naodet w’r ‘ne ieëste väörraod van gesjikdje verhaole bie-ein hawwe verzameldj, kóste w’r beginne. Doel woor óm neet allein oos leje te bereike, mer ouch bv. de minse die väöl allein thoes zitte, of in ’n verzörgingstehoes verblieve. Alle 25 verhaole zeen de aafgeloupe tied ingespraoke door Marjo Jaski-Verheesen. Daoróm leek ‘t ’n leuk idee noe – es 25e verhaol – ouch ’n verhaol van Marjo te laote huuere.
’t Betruftj de herinnering aan ’n oetzunjerlike sportieve activiteit wo ’t nag sjoan, mer ouch spannendje herinneringe aan haef: die surfplank die baove oppe kenaalbrök wèndj vóng haw ouch…. Enfin loestertj mer.
’t Zuutj d’r nao oet det ’t thoes blieve nag langer geitj doere, dus w’r wille nag doorgaon mit dit project. Den mótte w’r waal äöver genóg verhaole kènne besjikke. Op dit moment löktj det, mer nuuj verhaole blieve nog stieëds welkom. Eur verhaol kèntj g’r insture nao info@veldekekrinkech.nl. Bie twiefel of ’n verhaol gesjiktj is, of mit anger vraoge kan m’n belle mit 0475 482149. En verder bliftj ’t nog stieëds: op de balk ónger dees inleiding ’t drieheukske aanklikke en de vertèlling begintj. Väöl loesterplezeer!