Dit is ’t twieëdje deil van ’t verhaol van Wil Vergoossen äöver ’t boerelaeve róndj 1900. ’t Ieëste deil höbtj g’r ’n paar waeke geleje kènne beloestere en stuitj ouch nag stieëds oppe website. Wil haetj gooj herinneringe aan det laeve oppe boerderie en interesse in de zakes die hae zelf neet haet mitgemaaktj. Det vreugtj hae den nao en zoa weurtj zien verhaol ‘n compleet tiedsbeeldj.
Marjo Jaski-Verheesen haet ’t weer väör uch ingespraoke. W’r wille nog èns ónger de aandach brènge, det ‘t jaomer is det bie naovraog sommige minse aangaeve det se nag neet aafwiste van dit verhaole project. Die minse doontj g’r oeteindelik ‘n plezeer door ze d’r äöver te vertèlle en eventueel d’r op te wieze wie ze oppe website kènne kómme. Moeilik is ’t neet, mer m’n mót ‘t ‘ne kieër gedaon höbbe. Bedanktj vas.
Dit verhaol is weer te beloestere door op de balk ónger dees inleiding ’t drieheukske aan te klikke. Väöl loesterplezeer!