Op woonsdig 14 juni is d’r weer ‘ne z.g. “Literaire aovendj” wo-op w’r sjrievers in ’t Limburgs ’n podium wille beje. Dees kieër zeen det sjrievers in Zitters dialek, aafgewisseldj mit zang. Op ’t programma staon:
Phil Schaeken, gedichte en verhaole in Zitters dialek. Zien gedichte gaon äöver ’t gedraag van de luuj, historische gebäörtenisse, oorlog, hónger, vluchtelinge en väöl waat óm ós haer te zeen en te belaeve is. Dök mit ’ne humoristische inslaag. Phil leverdje regelmaotig biedrages in Platbook en noe ouch nog in de rubriek Veldboeket.
John Hertogh neumtj zich gepensioneierd sjoolmeister, gebaore en getaoge in Zitterd. Hae is lid van de Algemeine Sjrieververskrink van Veldeke Limburg. Ouch hae sjreef regelmaotig in Platbook en Veldgewas en haetj ’n vaste rubriek in de VIA van de Limburger. John haetj ouch ’n paar beuk oetgegaeve. Van hem sjreef de väörzitter van Veldeke Krènk Zitterd: ‘Mit ein zjwierige pen nump John uch mit in zien belaeving van de dagelikse dènger óm häöm haer. Sóms serieus, sóms ontroerend, mer meistes mit ein pitsjuigske…’
René Haustermans is Zitterdenieër mit meziek in hert en zeel. Leedjes van Frits Rademacher, Jochem Ehrens en Toon Hermans brungtj hae op passendje meneer.
Det belaoftj dus weer ’ne echte Veldeke-aovendj te waere vol verhaole, gedichte en daobie passendje leedjes. De oetgenuuedigdje gaste kómme dees kieër allemaol oet Zitterd.
In de Pejjerhaof, Houtstraat 7, op woonsdig 14 juni a.s. aanvang 20.00 oer.