Bie de Limburgse finale van de Declamatiewedstried väör kènjer van de basissjoale, höbbe de deilnummers van de Krink Ech ’t good gedaon. Mer leefs 4 van de 9 podiumplekke! En daobie mer leefs 2 Limburgs kampioene: Noud Laumen oet Roostere en Thomas Laumen oet Pej. Noud in de categorie groep 3-4 mit ’t gedich “Pietje Kletsmajoor” en Thomas bie de categorie 5-6 mit ’n door mam gemaaktj gedich “Gelök”, womit hae ouch al bie de Echter finale väöl succes haw.
Daobie koom nog Inez Ermans oet Zöstere mit ’n twieëdje plaats categorie 5-6 en Suze Golsteijn oet Pej ’n twieëdje plaats bie de categorie groep 7-8. Allemaol van herte perficiat gewènsj. En ouch waardering väör de anger deilnummers, die eerder kampioen wore van Ech of Zöstere. Die móste deze kieër emes anges laote väörgaon. De Limburgse jury woor krities en lètdje op de finesses bie de väördrachte.
De Declamatiewedstried van Veldeke blif nao 20 jaor nog altied get waat kènjer, aojers en groataojers aanspruk. En waat ’t gebroek van ’t Limburgs op ’n sjoan meneer ónger de aandach brungtj.