Spraeke kènne w’r oos modertaal allemaol. Mer sjrieve zeker nog neet! “Wie sjrifs se det?” is ’n väöl gestèldje vraog. Daoróm gaeve versjillendje Veldeke-kringe al jaore cursusse óm ’t goed sjrieve volges de lèste spellingsregels te lieëre en te oefene. Es väörbereiding op ’t te haoje ieëste Echter Dictee in 2019 haet Veldeke Krink Ech de z.g. “Flitscursus” aangebaoje. Det woor ‘ne cursus van eine aovendj van zoaget 2-2 ½ oer. Daobie geitj cursusleider Piet Aben mit vaart en mit groate sprung door de z.g. Veldekespelling. Alle spellingsaafspraoke kómme aeve aan bod en verder kriege de deilnummers aanwiezinge wie en wo ze bie twiefel verder kènne zeuke.
Ouch dit jaor is – nao de coronaperiode mit ènkel digitale dictees – weer ’n life Echter Dictee geplandj. De “Flitscursus” kan dao ’n gooj väörbereiding op zeen. Mer deilnumme is neet allein interessant väör ED-deilnummers. Väör minse die regelmaotig get in ’t plat wille sjrieve, is ’t henjig de basisregels te kènne. Dao kan zónne cursus bie helpe.
De “Flitscursus 2023” vuntj plaats op vriedigaovendj 3 februari in de Fanfarezaal achter de Pejjerhaof (Ingang naeve de Lidl). Aanmelje (max. 20-25 deilnummers) kan zoa lang nog plaatse besjikbaar zeen door 6 euro per persoan äöver te make op raekeningnummer van Veldeke Krink Ech: NL65 RABO 0138 6319 64. In dae pries is ’n tas kóffie inbegrepe. G’r kèntj ouch gebroek make van de QR-code die ónger de foto stuitj. Den óntvangtj g’r automatisch berich van bevestiging.
Väör minse die geine QR-scanner op hunne tillefoon höbbe, kènne ouch hie klikke óm nao de pagina väör aanmeljing te gaon!
