In ’t nummer van Veldeke Bekèt det de leje vlak väör Kersmis thoes höbbe óntvange, is te laeze welke de planne van Veldeke Krink Ech väör ’t jaor 2023 zeen. Vanaaf noe ouch te laeze op dees website. In det nummer haet ouch de nuje väörzitter, Jos Wackers, zich get oetgebrèdjer väörgestèldj.
Minse die zich noe aanmelje es nuuj lid, kènne nog ’t ganse jaor mitdoon. De jaorlikse contributie is 30 euro väör ’n ènkel lid. Echpare of mieë persoane op ein adres betale 40 euro. Lid waere kan m’n ouch zónger aan de activiteite deil te numme; det is neet verplichtj. Es steunendj lid betaaltj m’n ouch 30 euro en krig g’r toch 4 x per jaor ’t nuuts van de Krink aan hoes door middel van ’t kwartaalblaad “Veldeke Bekèt”. Ouch steunendje leje – dus ènkel en allein óm ’t werk van Veldeke in breije zin te óngersteune: activiteite tót instandjhaojing van de Limburgse taal en volkscultuur – zeen van herte welkom.
Opgave es lid kan via ’t invölformulier op dees website. Mer kan ouch door ’n berich te sture per email: penningmeester@veldekekringecht.nl of per pos: Thaalpad 129, 6102 EH Pey-Echt. Gegaeves: naam, adres, telefoonnummer. En leefs ouch ’n emailadres (zoadet w’r ouch de Nuutsbreef kènne sture). Automatische betaling haetj oos väörkeur en kan eventueel geliek aangegaeve waere door ’t bankraekeningnummer te vermelje. De contributie weurtj in mieërt/april aafgesjreve door Veldeke Limburg. De administratie van VL verraekentj ein en anger vervolges mit de Krink.
tooste oppe nuje väörzitter
v.l.n.r:
ieëreväörzitter Ton van Wegberg, väörzitter Jos Wackers en vice-väörzitter Piet Aben van VKE