Ouch dit jaor weer zólle w’r de regiofinales van de Veldeke-declamatiewedstried äöpene mit ‘ne ferme góngslaag. Väör de kènjer van de basissjoale in de regio Ech (Ech, Pej, Slek, Sint Joas, de Boesj en de Deelgaard) zal det zeen kómmendje vriedig 12 april óm 19.00 oer in de Pejjerhaof in Pej, Houtstraot 7.
De aafgeloupe waeke zeen al op versjillendje sjoale de sjoalfinales gehaoje óm te bepaole welke kènjer dit jaor ’n rundje verder kènne gaon. Edere kieër weer spannendj, väöral väör kènjer die de ieëste kieër mitdoon.
Väör deze declamatiewedstried zeen de gedichte ingedeildj in 3 categorieë: groep 3 en 4, groep 5 en 6 en groep 7 en 8 van de basissjoal. Wie bekèndj lètj de jury bie de wedstried op wie ’n gedich nao väöre weurtj gebrach: is ’t good verstaonbaar, neet te vlot? Lieëtj ’t kèndj merke det ’t de tekst ouch begrepe haet en dröktj ’t det good oet? Weurtj ’t Limburgs – welk dialek den ouch – good verstaonbaar oetgespraoke? Pas op de lèste plaats tèlle zakes es wie m’n d’r op stuitj, of welke spulle m’n bie zich haet óm de tekst te óngersteune. Det kan natuurlik waal van invloed zeen, mer op de ieëste plaats geitj ’t óm de väördracht.
Wie den ouch…spannendj is ’t altied. Väör waem väör ’t ieës mit duitj, mer ouch de ervarene kónne d’r neet zónger mieë van oet gaon, det ze dit jaor (weer) in de prieze valle! Ofsjoan ervaring soms waal te merke is. Det kan ‘ne stimulans zeen óm weer mit te doon.
Óm mit te doon kènne de kènjer zich aanmelje via de sjoale: de aojers mótte ’n opgaveformelier invölle. Oppe Nuujstadt en in St. Joas geitj de aanmeljing dit jaor via de bibliotheek. Opgaeve väör de finale in Pej kan tót uterlik 8 april.
Väör de kènjer van de sjoale in Zöstere, Roostere en de Nuujstadt is de regiofinale in de Hermeniezaal in Zöstere op vriedig 19 april.
