Oetslaag van de declamatiewedstried in Ech

Op vriedigaovendj 12 april waerdje in ‘ne volle zaal “de Pejjerhaof” de ieëste regiofinale gehaoje van de Veldeke declamatiewedstried.Det waerdje ‘ne lange aovendj, want mer leefs 34 kènjer wore eerder op hun basissjoal al aangeweze of geselecteerdj óm aan dees finale deil te numme. Toch waerdje, nao de äöpening door väörzitter Ton van Wegberg en wedstriedcoördinator Piet Aben, in ’n vlot tempo ’t programma aafgewèrktj. Wobie door presentatrice Patricia Beijer stieëds effe aandach woor väör edere deilnummer.
De jury, dit jaor bestaondje oet José Verheyen, Frans Esser en Phil Schaeken, kreeg ’t zwaor vanwaege de gooj väördrachte, mer ouch ómdet versjillendje gedichte dökker v’rbie kome en den mós se oppe finesses gaon lètte. Eder kèndj duitj ’t anges en den gaeve oetspraok, bewaeginge, mimiek en spontaniteit dök de doorslaag.

Wèthaojer van Cultuur, Marian Bruysten, sprook kort väör ’t bekèndj make van de wènnieërs waardering oet väör al die väördrachte, de mitwèrking van zaoväöle en väör ’t feit det Veldeke Krink Ech ’n actieve vereniging is in de gemèndje Ech-Zöstere, die deze wedstried noe al väör de 18e kieër organiseerdje.

En toen koom de oetslaag:

Van groep 3 en 4:

Plaats 1: Lynn Wilms (Basissjoal Patricius, Pej) mit ’t gedich “Is mich det sjrikke”;
Plaats 2: Isa Op het Veld (Basissjoal Patricius, Pej) mit “Tèlle is zoa leuk”;
Plaats 3: Tijn Korrel (Basissjoal Patricius, Pej) mit “Is mich det sjrikke”.

Van groep 5 en 6:

Plaats 1: Nils Knoben (Basissjoal Patricius, Pej) mit ’t gedich “Verdrèjd”;
Plaats 2: Lorena Iedema (Basissjoal de Violier, Ech) mit “Eine Wèndj”;
Plaats 3: Lida Alikhani (Basissjoal Angela, Ech) mit “’ne Oppasser”.

Van groep 7 en 8:

Plaats 1: Vinnie Huisman (Basissjoal Patricius, Pej) mit ’t gedich “50 euro”;
Plaats 2: Lieke Delissen (Basissjoal Angela, Ech) mit “Gaetjes sjete”;
Plaats 3: Megan van de Velde (Basissjoal Angela, Ech) mit “50 euro” .

Väör de deilnummers oet “Groat Zöstere” is de finale kómmendje vriedig, 19 april, vanaaf 19.00 oer in de Hermeniezaal aan de Feurthstraot.

Geef een antwoord

Het e-mailadres wordt niet gepubliceerd.