Ónger dae titel zal op dónderdig 17 oktoaber a.s. vanaaf 20.00 oer in de Hermeniezaal in Zöstere väör de viefde kieër ‘ne geweldige aovendj geprissenteerdj waere mit meziek en väördrachte vanoet versjillendje kerne van oos gemèndje, gebrach door jónk en awd.
Ouch noe weer liktj de organisatie van deze aovendj in henj van de samewèrkendje dialek- en heemvereniginge Veldeke Krink Ech en de Vereniging van Natuurvrienden oet Zöstere.
De leje van dees vereniginge, mer ouch alle anger belangstèllendje zeen van herte oetgenuuedigdj óm d’rbie te zeen. De entree bedreug väör ederein 5 euro, aan de kassa.
De väörgaondje edities van “S(j)terre S(j)traole” wore allemaol ’n succes. De verrassendje aafwisseling van meziek en väördrach maaktj d’r ‘ne óntspannendje aovendj van. En de bekèndje en minder bekèndje artieste laote zich van hunne bèste kant zeen. Wie väörige kieër: Spik en Span mit minder bekèndje, röstige leedjes en Ria Renet mit de sketch äöver ziene “onzichbare hóndj”. “S(j)terre S(j)traole” kós toen al raekene op ‘ne volle zaal, mer in de Hermeniezaal is nog plaats genóg. Kómtj dus gerösj weer en vraogtj minse óm ouch èns mit te kómme loestere nao dees pareltjes van Limburgse cultuur.
Weer haope uch te zeen op 17 oktoaber in Zöstere!
‘t bestuur van Veldeke Krink Ech en van De Vereniging van Natuurvrienden van Zöstere.
*) Woróm die “j” tösse häökskes?
In Ech zaet m’n “sterre” en “straole”. In Zöstere zitj in de oetspraok dao dudelik die “j” tösje: “sjterre” en “sjtraole” dus.
