Echter Dictee begintj eerder

’t Kómmendje ieëste Echter Dictee op zóndigmiddig 24 mieërt in ’t Cultuurhoes aan de Plats, zal neet óm 2 oer, mer ’n half oer eerder beginne. De aangemeldje deilnummers kónne vanaaf 13.00 oer bönne loupe in ‘t “groat kefee” (waat vreuger de Gooj Kamer woor) , wo ze de lèste aanwiezinge kriege. Anger belangstèllendje waere väör 13.30 oer verwachtj. Ingank aan de kantj van de Vriethaof.

Opgaeve óm mit te doon, kan nog stieëds. Waem det duitj, geitj väör de prieze. Hun dictee weurtj nao ’t sjrieve opgehaoldj en door de jury naogekeke. Dees deilnummers kómme in aanmerking väör ‘n 1e, 2e, 3e of 4e plaats. De oetslaag van de jury stuitj neet ter discussie. Alle deilnummers, die zich höbbe aangemeldj, kriege nao aafloup ’n oorkonde. Degene mit de minste foute volges de jury, kan nao hoes gaon mit de Echter Krakeling-wisseltrofee en moog dem ’n jaor lank in bezit haoje.

Mitdoon kan in principe ederein: inwoners van de gemèndje Ech-Zöstere, mer ouch anger belangstèllendje oet de regio of van dao boete. De titel “Echter Dictee” wiltj aangaeve det de zinne in good Echter dialek waere väörgelaeze. En det es criterium väör de jurering deentj de spelling oet ‘t “Brònsgreun Beukske”. Ederein, kleine of groate leefhöbber van de Limburgse taal en van de spelling d’rvan kan dus mitdoon.
Bie ’t mitdoon zónger jurering kan ederein zelf zien of häör dictee naokieke aan de handj van de ónger de pauze geprojecteerdje gooj sjriefwieze. De organiserendje wirkgroep van Veldeke Krink Ech haoptj det ‘t ’n gezellige wedstried zal waere ónger ’t motto: “Wae sjriftj, dae bliftj”. Nao aafloup óm zoaget half vief kan nog naogekaldj waere in ’t kefee.

Aanmelje väör ’t Echter Dictee is mäögelijk tót 17 mieërt. Daonao neet mieë in verbandj mit de organisatie en väörbereidinge. Ouch mót m’n raekening haoje mit vol=vol. W’r wete neet wie graot de belangstèlling zal zeen, mer de ruumte väör zit- en sjriefplekke in de zaal is neet ónbeperktj. Gaef uch dus oppertied op. Det kan mit behulp van óngerstaondje link of mit de QR-code.

Opgaaf Echter Dictee 24-03-2019

Geef een antwoord

Het e-mailadres wordt niet gepubliceerd.