De annexatie van de Selfkantj

Op woonsdig 18 mei a.s. zal de volgendje Veldeke-aovendj plaatsvènje.

’t Betruf ‘ne thema-aovendj äöver de annexatie van de Selfkantj van 1948 tót 1963. Dees activiteit stóng al geplandj in 2020 en det woor i.v.m. de herdènking van 75 jaor nao de oorlog, mer mós twieë kieër waere oetgestèldj. Noe kan ’t den toch en de informatie is nog stieëds interessant en ouch actueel.

’t Is bienao neet te gluive, mer w’r höbbe es Nederlandj pas ’n gooj 50 jaor geleje ‘n stök landj, det weer nao de Twieëdje Waereldoorlog geannexeerd hawwe, trök gegaeve. ’t Geitj hie äöver de Selfkantj, dae van 1948 tót 1963 tot oos landj haet gehuuerdj. De toenmalige gemèndjes Ech en Zöstere grensdje dao aan en hievan zeen nag väöl spaore trök te vènje in oos streek. Ouch in ’t gebroek van ’t plat.

De Selfkantj waerdje in 1948 geannexeerdj – nao lang touwtrèkke en zónger de minse van de Selfkantj te vraoge. ’t Waerdje gezeen es sjaajvergeujing nao de oorlog. In 1963 is ’t gebied weer Duits gewore, wie väöraaf bepaoldj en toen ouch op verzeuk van de inwoners.

‘t Programma van deze Veldeke-aovendj bevatj väöl beeldjmateriaal en gesprekke. W’r beginne mit ’n filmke van de NOS “Met het oog op morgen”, oet 2019. Aansloetendj ‘n presentatie door dr. Mignon Schichel, gepromoveerdj aan de UM in Mestreech. Zie zal vertèlle äöver de historische achtergróndj en gesjiedenis, en de belaeving van ein en anger door de minse van de Selfkantj.

Nao ’n pauze volgtj ’n gefilmdj interview van 2 dames:  getugeverslage van minse van de Selkantj die ’t allemaol zelf höbbe mitgemaaktj.

Op deze Veldeke aovendj kieke w’r mit name ouch nao de taalvariaties en äövereinkómste in dit gebied. Ouch hie beginne w’r mit ’n kort filmke äöver waat mit taal en dialek gebäörtj ónger dit saort omstandigheje. Daonao is ’t waord aan de awd-taalcoördinator van de provincie, dr. Pierre Bakkes, äöver de Selfkantj en ’t dialek waat dao gespraoke weurtj. En woróm det anges is es in bv. Waldfeucht. Det belaoftj ‘ne interessante en óngerhaojendje aovendj te waere.

De activiteit vuntj plaats in MFC Pejjerhaof op 18 mei vanaaf 20.00 oer. Väör leje gratis; neet leje zeen ouch van herte welkóm mer betale 3 euro entree.

Reageren is niet mogelijk