Nao de al versjillendje jaore bestaondje cursus “Limburgs laeze en sjrieve”, wo-aan ouch bönne oze Krink al väöl minse höbbe mitgedaon, startj bönnekort ’ne nuje cursus, dae minse wiltj helpe die ’t Limburgs plat zoewe wille lieëre spraeke. De aafdeiling Limburgs, van de vereiniging van taaldocenten “Levende talen” haet mit subsidie van de “Raod veur ’t Limburgs” deze cursus kènne óntwikkele.
Waem zoe Limburgs wille lieëre spraeke? Det zeen dök minse die van boete de provincie hie zeen kómme wone. Vanwaege werk of anges. Es die al langer hie wone, verstaon ze ’t Limburgs soms waal, mer spraeke durve de meiste neet. “Kal mer gerös plat” zègke ze den; ich verstaon ’t waal. Dit óm aan te gaeve det väör hun de groep neet hoof äöver te sjakele op ’t Algemein Nederlands. Ouch Limburgers, die van hoes oet neet ’t Limburgs höbbe lieëre spraeke, make de wèns óm plat te lieëre kalle regelmaotig kènbaar. Väör al die minse kan deze nuje cursus ’n oplossing zeen.
Deze cursus is dus gerichtj op Limburgs kalle en verstaon, neet ’t sjrieve en/of de spelling. D’r zeen al genóg aanmeljinge óm op 20 september a.s. te beginne. Door mitwèrking van de gemèndje Ech-Zöstere kan det in ’t Cultuurhoes aan de Plats. Mer de kursus is neet oetsloetendj gerichtj op lokaal (Echs) dialek; ederein oet de omsjreve doelgroep en woonechtig of wèrkzaam bönne ’t gebied tösse Zitterd en Remunj (en eventueel ouch daoboete) kan deilnumme. Docente die deze kursus gaon gaeve zeen gerichtj op variaties, in wäörd en in oetspraok. De deilnummers zólle mit vakkundige aanwiezinge meujte mótte doon en oefene óm zich dit eige te make. Info: marjo.jaski@icloud.com
