De aafgeloupe jaore, van 2015 – 2019 haet Veldeke Krink Ech eder jaor ’n poëziewanjeling op ’t programma gehadj in ’n sjoan ómgaeving bönne ’t wèrkgebied van de krink. Die activiteit woor vanaaf de ieëste kieër ’n succes. Óm dao op trök te kieke, gaeve w’r noe ’n beukske oet mit ’n besjrieving van de wanjelinge: Lilbosch, Zöstere, Staeveswaert, Ech-centrum en de Nuujsjtadt. Mit foto’s en mit gedichte.
De sjrievers wore meis leje van de Sjrieverskrink Midde-Limburg, womit VKE al eerder bie activiteite haw samegewèrktj. En noe dus 5 jaor achterein väör de poëziewanjelinge. Det haet väöl nuuj gedichte of verhaole opgeleverdj. In ’t book van de 5 jaor poëziewanjelinge zeen die aafgedröktj naeve of taege de achtergróndj van sjoan foto’s die van de wanjelinge zeen gemaaktj. Daomit is ’t book ’n herkènbaar bezit, hieël fejn óm te höbbe, in te kieke en in te laeze. Eventueel aan de handj d’rvan de wanjelinge (nog) èns te make. Mer ’t is ouch hieël gesjiktj óm cadeau te gaeve aan emes dae mit de streek of de betreffendje kerne get haet.
Aanvankelik zoe ’t book in mei zeen versjene. De óntwikkelinge mit ’t coronavirus en de daomit samehangendje maotregele höbbe de oetgave vertraogdj. ’t Is noe de bedoeling det ’t in september of oktoaber versjientj, es w’r den tegeliek ouch weer ’n passendje prissentatie kènne organisere. Väör leje geitj ’t book – 62 blz. in kluuer – 10 euro koste bie väörinsjrieving. Det kan volges de aanwiezinge in en bie ’t lèste nummer van Veldeke Bekèt. Nao oetgave zal de pries 12,50 euro zeen, ouch verkriegbaar via de bookhanjels.
