Op de lès gehaoje jaorvergadering is penningmeister Theo Bougie beneumdj es ieërelid van Veldeke Krink Ech. Theo haw zich neet mieë besjikbaar gestèldj väör ’n nuuj bestuursperiode. Nao ’n äöverzich door väörzitter Jos Wackers woor de vergadering van oordeil det zien biedrage aan VKE in de aafgeloupe periode – neet allein op financieel gebied, mer ouch bie de digitalisering, bie de tegels op de straot in Pej en bie ’t regele van de verkoup van beukskes e.d. via de verkouppuntje, van dusdanig belang is gewaes, det dit ’n ieërelidmaatsjap rechvaardigtj. Opmerkelik daobie is det zien echtgenote Riet zeve jaor geleje, bie häör aafsjeid, ouch ’n ieërelidmaatsjap is toegekèndj.
Es nuuj bestuurslid is nao ’n inloupperiode door de vergadering beneumdj Jeanne Vaessen-Delsing, die in ‘t vervolg ’t penningmeistersjap en de lejeadministratie op zich zal gaon numme.
