Kómmendje zóndigmiddig 17 mieërt 2024 weurtj väör de 3e kieër in life Echter Dictee gehaoje. Ouch noe weer in ’t Cultuurhoes Edith Stein aan de Plats in Ech. Deilname stuitj aope väör ederein. Aan deilname zeen gein köste verbónje.
Mark Jessen, de wènnieër van väörig jaor, zal aan ’t begin ziene wisseltroffee kómme ómrule väör de begeerdje glazere Echter krakeling, die bie ’n ieëste plaats huuertj. En waem moog de troffee den vervolges dit jaor mit nao hoes numme?
De prissentatie van de dicteezinne zal plaats vènje door L1 programmamaker Henk Hover, dae ’t dictee ouch haef samegestèldj. Daonao vuntj ’t officiële väörlaeze, conform ’t reglemènt, plaats door Piet Aben.
Mitdoon aan ’t dictee kan nog. Det kan op twieë menere: deilnumme mit jurering of – wie m’n det zaetj – väör spek en boane”. Wie det precies zitj, is op dees website te laeze ónger “Activiteiten> dictees.
Bie ’t Echter Dictee geitj ’t d’róm op ’n sportieve en eventueel competatieve meneer te kieke wie ’t stuitj mit ’t sjrieve van oos eige taal.
