De jaorvergadering van Veldeke Krink Ech weurtj dit jaor gehaoje in ’t MFC De Pejjerhaof, Houtstraot 7 in Pej, op woonsdig 1 juni 2022 óm 20.00 oer.
Ómdet de jaorvergadering 2020 door corona pas in oktoaber van ’t väörig jaor kós plaatsvènje, haetj ’t bestuur d’rväör gekaoze óm de vergadering 2021 op 1 juni door te laote gaon.
Nao óntvangs mit kóffie en vlaai, zulle ieës de statutair verplichte óngerdeile aan bod kómme, zoa-es ’t jaorverslaag en ’t financieel verslaag. Helaas woor ouch dit ’n jaor wo-in väöl activiteite neet door kóste gaon.
De kascontrolecommissie, bestaondje oet Rose-Marie Linssen en Paul Lamers, zal verslaag oetbrènge van hun bevènjinge, bie ’t doornumme van de stökke en daonao kömptj de beneuming van ’n nuuj lid van de kascontrolecommissie. ’n Gooj traditie in ieëre haojendj, stèltj ’t bestuur väör óm de contributie 2022 neet te verhuuege.
Den volgtj de (her)beneuming van de bestuursleje. Volges ’t ruuester van aaftraeje zeen Yvonne Smeets en Magna Bedaf aan de bäört óm aaf te traeje en ze stèlle zich allebei herkeesbaar.
Óndanks diverse poginge óm ‘ne nuje väörzitter te vènje, is det nog steeds neet gelöktj! Hiebie dus weer ’ne dringendje oproop. Es g’r affiniteit höbjt mit Veldeke Ech en g’r wiltj uch lidmaatsjap oetbreije mit dees functie, numtj den ‘ns vrieblievendj contac op mit ein van de bestuursleje, den kènne w’r óm de taofel gaon zitte óm ‘ns te bespraeke waat dees functie inhöltj en wie geer dao taegenaan kiektj!
Nao de pauze gaon w’r verder mit de foto-prissentatie van Geert Janssen. Hienao zal Ton Slijpen oetlèk gaeve äöver ’t digitale dictee. Tössedoor zal Laura Theunissen zien gedichskes väördrage.
