Vanaaf dónderdig 2 juni zeen kaarte te bestèlle väör ’t concert det ’t Reünie Orkest van de Limburgse Jagers op zóndigmiddig 19 juni a.s. kömtj gaeve op oetnuuediging van Veldeke Krink Echt bie gelaegenheid van ‘t 45 jarig bestaon van de krink.
’t Aanbeje van zo’n concert leek Veldeke ’n good idee, ouch ómdet ‘t al weer get jaore geleje is det het reünie-orkest ‘n concert in Ech haef gegaeve. Dit concert is den ouch bedoeldj väör zoawaal de leje es ouch belangstèllendje van boete de vereniging. ‘t Vuntj plaats op zóndigmiddig 19 juni óm 14.00 oer in MFC de “Pejjerhaof”, Houtstraot 7.
Kaarte väör dit concert kónne á 7,50 euro bestéldj waere via de website www.veldekekrinkech.nl. Nao bestèlling en betaling krigtj m’n ’n kaertje gestuurdj óm oet te printe of op de telefoon te zètte. Ein en anger zoa lang es zitplaatse besjikbaar zeen.
‘t Concert op 19 juni zal gevarieerdj van inhoud zeen; ‘ne greep in ’t oetgebrèdje repertoire van de Limburgse Jagers, wobie de bezeukers aan ’t ènj wie gebroekelik mit de witte zakdeukskes kènne zwejje! Speciaal is dit jaor eine z.g. “corona-koraal”, wobie ’t orkes de begeleiding verzörgtj bie ’n dankgedich aan de zorgmitwèrkers. Tösse de meziek zal verder nog ruumte gebaoje waere väör o.a. ènkele väördrachte door wènnieërs van de Veldeke-declamatiewedstried van dit jaor.
