De Veldeke “literaire aovendj” is d’r dit jaor eine mit twieë sjrievers en ein zangeres. Aafwisselendj väördrachte en meziek, wobie de gedichte en verhaole waere väörgelaeze door Toos Schoenmakers-Vissers en Riky Simons Julicher. Van allebei höbbe weer hie al regelmaotig gedichte laote laeze in oos Veldeke Bekèt.
Toos is gebäörtig oet Vlodrop (Vlorp) en woontj noe in Postert. ’t Boetegebied van de Roerstreek inspireertj h’m in alle sezoene van ’t jaor, mer zie vuntj ouch inspiratie in de gewuuen dènger van ’t laeve. Toos sjrif zien laeve lang en nog regelmaotig, ónger angere in de Platbeuk en op de digitale site “Veldjgewas”.
Riky, lid van oze krink, kènne w’r väörnamelik es lid van de Sjrieverskrink, bie oos poëziewanjelinge en es auteur van de beukskes väör kènjer. Riky woontj in Zjwame en lieëtj zich ouch gaer inspirere door de natuur. In de versjene 25 deile van Platbook kome zien gedichte ouch regelmaotig väör.
Zoawaal Toos es Riky laote zich deze aovendj gaer biestaon en begeleije door de zangeres Willeke Simons. Willeke, ouch gebaore in Postert en noe wonendj in Remunj, treutj de lèste jaore regelmaotig op mit väöral zien Limburgstalig repertoire. Meziek dae de minse raaktj, of det noe bie ’n dreuvige of ’n blie gelaegenheid is. Vaste begeleidster is Jolanda Wolters.
De combinatie van väördrachte en meziek belaoftj weer ‘ne sjoane aovendj te waere. De ieëste Veldeke-aovendj in de zaal van dit sezoen. Nao twieë kieër op ’t programma gestange te höbbe en oetgestèldj te waere, zal deze aovendj noe kènne doorgaon. Op woonsdig 20 april óm 20.00 oer zeentj g’r allemaol weer welkom in de Pejjerhaof, Houtstraot 7 in Pej-Ech.
