’t Gebroek van ’t Limburgs in ’t óngerwies is altied al ’n puntj gewaes. Kan ‘t? Moog ‘t? En wie den? Altied al väörstenjers mer ouch minse väör waem ’t neet hoof. Toch hultj de erkènning van Limburgs es Europese streektaal ouch in det d’r aandach väör mót zeen op sjoale. Es Veldeke Krink Ech wille w’r det doon door op deze thema-aovendj de standj van zake op te make en uch te informere. Daoväör brènge w’r get minse bie-ein mit ervaring en deskundigheid op dit gebied. Daomit weurtj ‘t ‘ne aafwisselendje aovendj, mit versjillendje prissentaties: wie is de standj van zake in de peuterspeelzale? Waat doon de basissjoale al? Wo ervaartj ’t väörtgezèt óngerwies de probleme es se Limburgs geis gebroeke in de klas? Waat duitj Veldeke en wie kan Hoes veur ’t Limburgs ’n biedrage levere?
Limburgs es taal behaoje, is mäögelikheid beje óm die taal äöver te drage. Dao kènne w’r allemaol ’n biedrage aan levere, mer óngerwies is ‘ne belangrieke partner. Kómtj kieke, loestere en mesjien mitkalle. Woonsdig 10 mei óm 20.00 oer in de Pejjerhaof. Witj g’r emes dae dit ouch waal zoe interessere? Vraog dem den mit!
