Edere ieëste maondig van de maondj weurtj ’n half uurke väörgelaeze in Nederlands en op edere 3e maondig van de maondj in ’t plat door vriewilligers van Veldeke Krink Ech. Det zal dus kómmendje maondig 19 december weer zeen.
’t Väörlaeze is bedoeldj väör kènjer van zoaget 4-7 jaor en is van 16.00 – 16.30 oer in de Laeswinkel-Bibliotheek aan de Bäövestestraot in Ech. De vriewilligers keze ’n verhaol oet spannendje beukskes en höbbe dao soms nog get te teikene of te kluuere bie. Aojers of groataojers kènne mit de kènjer same kómme. Ónger ’t väörlaeze kènne zie eventueel röstig zelf ’n book oetzeuke, de gezèt laeze of ’n baekerke kóffie drènke. Vertèltj dit verder, want väörlaeze vènje de kènjer leuk en kan neet dök genóg gebäöre. En d’r moge gerös nog waal ’n paar kènjer bie.
