2e Echter Dictee

Nao twieë jaor vanwaege corona geëxperimenteerdj te höbbe mit digitale dictees, zal bönnekort weer ’n laevendje versie plaatsvènje en waal op zóndigmiddig 26 mieërt 2023 in ’t Cultuurhoes Edith Stein aan de Plats in Ech. Deilname stuitj aope väör ederein.

Bie ’t mitdoon zeen d’r 2 mäögelikheje: deilnumme mit jurering. ’t Dictee weurtj den nao ’t sjrieve opgehaoldj en door de jury naogekeke. ’t Besloet van de jurering en ’t aantal behaoldje puntje óntvange ze persuuenlik. De deilnummers mit de minste foute kómme in aanmerking väör ‘n 1e, 2e, of 3e plaats. De oetslaag van de jury stuitj neet ter discussie. Mitdoon mit jurering is speciaal väör diegene die al dökker in ’t Limburgs sjrieve, get regels kènne en zich sportief wille maete mit anger deilnummers. Neet mieë, neet minder!

Bie ’t mitdoon zónger jurering kan ederein ’t dictee make en zelf zien of häör dictee naokieke aan de handj van de ónger de pauze geprojecteerdje gooj sjriefwieze. Dees mäögelikheid is speciaal väör waem ’t èns zoe wille probere in good plat te sjrieve, mer väör waem d’n oetslaag neet belangriek is. Mesjien vèltj ’t mit en geis se ‘ne volgendje kieër ouch väör jurering mitdoon. En vèltj ’t taege, den höbs se d’r in eder geval get van gelieërdj.

Want dao geitj ’t óm: op ’n sportieve en eventueel competatieve meneer kieke wie ’t stuitj mit ’t sjrieve van oos eige taal!

Alle deilnummers, die zich höbbe aangemeldj, kriege nao aafloup ’n oorkonde. Degene mit de minste foute volges de jury, kan nao hoes gaon mit de ‘Echter Krakeling-wisseltrofee’ en moog dem ’n jaor lank in bezit haoje.

Väör minse die geine QR-scanner op hunne telefoon höbbe, kènne ouch hie klikke óm nao de pagina väör aanmeljing te gaon!

Reageren is niet mogelijk