2 x Flitscursus Spelling

Kómmendje vriedig 25 januari weurtj väör de twieëde kieër de Flitscursus Spelling gegaeve. De ieëste kieér, op 11 januari, woor good bezatj en de deilnummers wore erg kontent. De aanstaondje vriedigaovendj zal dezelfdje inhoud höbbe.

Cursusleider Piet Aben zal de belangriekste spellingsaafspraoke väör de Limburgse taal v’rbie laote kómme en kort bespraeke. Hae duitj det systematisch, zoadet alles aan bod kömtj: medeklinkers, klinkers, werkwäörd, oetzunjeringe, enz. Mer hae zal ouch ingaon op vraoge. Op eine aovendj mót det allemaol kort, mer m’n kan d’r good mit oet de veut en zich behelpe. Daonaeve get materiaal mit nao hoes óm nog èns nao te kieke.

De Flitscursus weurtj gegaeve in de Fanfarezaal in Pej, achter de Pejjerhaof. De ingank is vanaaf de parkeerplaats langs de Lidl. ’t Begintj óm 19.00 oer en zal zoaget tót 21.30-22.00 oer doere. De koste zeen 5 euro p.p., inclusief ’n tas kóffie en cursusmateriaal. Leefs opgave väöraaf in verbandj mit de väörbereidinge (tslijpen@gmail.com, of aa.jetten@gmail.com. of gebroek de QR-code), mer es det neet mieë löktj gewuuen kómme. Betale kan op de aovendj zelf.

Mitdoon aan de Fliscursus kan ’n good opstepke zeen väör ’t deilnumme aan ’t Echter Dictee op 24 mieërt a.s. Mer det hoof natuurlik neet. Get mieë van de spelling van ’t Limburgs aafwete, kan ouch henjig zeen in alle dagelikse situaties, bie de väörbereidinge väör de vastelaovendj, bie ’t sjrieve van kaarte enz.

Geef een antwoord

Het e-mailadres wordt niet gepubliceerd.