Es vervolg op de gelieknamige activiteit twieë jaor geleje in St. Joas, geitj Veldeke Krink Ech dit jaor op woonsdig 28 augustus väör ’n activiteit nao Roostere. Same mit ’n paar vertegewoordigers oet de gemeinsjap is väör dae aovendj ’n programma opgezatj det bestuitj oet ’n oer wanjele door ’t dörp en aansloetendj ’n programma in de zaal van ’t MFC/Gemeinsjapshoes. Deilname stuitj aope väör leje van VKE en minse oet Roostere. In verbandj mit de organisatie is opgave väöraaf nuuedig.
Lekker ’n stökske wanjele door Roostere, langs 4 markante – bekèndje of minder bekèndje – lokaties, mit get meziek en sjoan gedichte of verhaole. En daonao nog ’n gezellig same-zeen in ’t Gemeinsjapshoes, mit amusement van Roosterse artieste. Waem wiltj det noe neet?
De wanjeling startj óm 19.00 oer vanaaf de Mert, taegenäöver de Kèrk. Deilnummers dene óm 18.45 aanwezig te zeen, want d’r waere 4 groepe gevórmdj die achtereinvolgendj – in wisselendje volgorde – de volgendje lokaties bezeuke: Kestieël Eyckholt, ’t Jeugdhónk, de Roosterhoeve en de Kèrk. Op elk van die plekke is ’n kort programma mit meziek en ’n väördracht door emes van de Sjrieverkrink Midde-Limburg. Natuurlik raekene w’r op ‘ne sjoane zomeraovendj. Nao aafloup hievan treffe alle deilnummers zich in ’t MFC/Gemeinsjapshoes. Dao zal den ’n aanvöllendj programma gebaoje waere mit verhaole, gedichte, leedjes en beeldje, allemaol betrèkking höbbendj op de kern Roostere.
Deilnumme aan dees activiteit geit es volgtj: per deilnummer 5 euro äövermake op raekeningnummer NL 65 RABO 0138 6319 64 van Veldeke Krink Ech. Minse oet Roostere vermelje daobie hunne naam + adres of tel.nr.; leje van VKE vermelje hun lidnummer. Väör dae pries krig m’n bie bönnekómst in de zaal ’n consumptie en ’n zitplaats.
