De twieëdje regiofinale in de Veldeke declamatiewedstried woor op zóndigmörge 10 april jl. in de Hermeniezaal in Zöstere. Mit op de achtergróndj de oetgestaldje instrumènte väör ’t optraeje van “Zöstere zunk” det smiddes waerdje gehaoje, móste de 18 finaliste van 2 deilnummendje sjoale (vanoet de Nuujsjtadt wore d’r dit jaor jaomer genóg gein deilnummers) hun gedichte väördrage.
De zaal woor deze vreuge mörge gans good bezatj mit deilnummers, aojers, groataojers, lieërkrachte en anger belangstèllendje. De kènjer die op hun eige sjoal al door de selectie wore gekómme, kóste zich noe maete mit kènjer van de anger basissjoal en det goof weer nuuj spanning. Gelökkig woor dao prissentator Jos Douven, dae mit ’n inleidendj präötje ederein weer op zien of häör gemaak wis te stèlle.
De zwaorste taak woor väör de jury, óm oet te make waem ’t gekaoze gedich ’t bèste haw väörgedrage. Oeteindelik koom dao-oet de volgendje oetslaag:
Categorie groepe 3 en 4
1. Kampioen van Zöstere en tegeliek kampioen van ’t Smaalste Stökske Nederlandj:
Isabelle Gouder de B., OBS de Springdonk – gedich: ”Ich wil allein nog…”
2. Inez Ermans, OBS de Springdonk – gedich: ”Ich wil allein nog…”
3. Niels Joren, BS Int Park – gedich: ”Vraemde vogel”
Categorie groepe 5 en 6
1. Kampioen van Zöstere en tegeliek kampioen van ’t Smaalste Stökske Nederlandj:
Noa van Beurden, OBS de Springdonk – gedich: ”Jojoë”
2. Finn Schepers, BS Int Park- gedich: ”Sjterre plökke”
3. Fenna Bijsmans, BS Int Park – gedich: ”Mien oma”
Categorie groepe 7 en 8
1. Kampioen van Zöstere en tegeliek kampioen van ’t Smaalste Stökske Nederlandj:
Lynn Slakhorst, BS Int Park – gedich: ”Taal is lestig”
2. Mika Krijntjes, BS Int Park – gedich: ”Taal is lestig”
3. Mats van Gils, SBO de Horst – gedich: ”Mit de fits”
Naodet de resultate bekèndj wore gemaaktj, waerdje de prieze oetgereiktj door ieëre-väörzitter Ton van Wegberg van Veldeke Krink Ech same mit de väörzitter van de wirkgroep Declamatie, Ruud Roumen en de juryväörzitter Peter Feijen.
Smaalste Stökske.
Väör de wènnieërs van de 1e plaatse woor d’r nog ’n extra attentie. Die waerdje oetgerope tót “Kampioene van ’t Smaalste Stökske van Nederlandj”. Dit haw de organisatie gedaon, ómdet dit jaor nog gein Limburgse finale kós zeen, ómdet te weinig Veldekekringe al ‘ne declamatiewedstried höbbe gehaoje. Gebroekelik is det de wènnieërs van ’n 1e plaatse dao-aan moge deilnumme. Daoróm nu dus väör eine kieër deze titel.
Veldeke Krink Ech danktj alle deilnummers en alle mitwèrkendje. Volgendj jaor weer!?
